تخاريف صيف

ما دريتي يا أم محسن ان بنت الجيران تزوجت رجال أكبر منها بثلاثين سنه هي 25 وهو 55 سنة الشايب العايب عنده عيال ومتزوج ثنتين قبلها ، وبعد مسوي عرس في الشيراتون اللي ما يستحي ومسافر شهر العسل بيروت عساه بصل عليه وعليها ، شوفي شلون الناس يقطون بناتهم ، لا وبعد ولد صالح اللي تزوج من كم شهر طلق مرته تصدقين ، ومحمد ومرته رايحين شرق آسيا ومخلين العيال مع الخدامة في البيت عشان المصاريف واجد شوفي البخل وهو عنده الشركات والأسهم والعمارات صج بخل حاط الفلوس علي قلبه لا وبعد يا ام محسن تصدقين ام سعد ماسافرت السنة وقعد بالدوحة.. (هذه بعض التجمعات النسائية بالحش..).
يا بوطروق تصدق ان بروك بيحترف في نادي كبير بمبلغ اكبير مب احنا لعبنا ومحد عرفنا ولا حتي مهرجان اعتزال ما سوي لنا . لا بعد آخر كلام قالوه ان المنتخب بيحلون جميع اللاعبين الوطنيين وبيجيبون اجانب وبيعطون اللاعبين جميعآ وظائف ادارية براتب كبير ... لا بعد بيحطون مدربين حق لكل خط مدرب لخط الهجوم ومدرب للوسط ومدرب للدفاع طبعاً بجانب مدرب حراس المرمي... (هذا كلام بعض فلاسفة كرة القدم في المجالس والديوانيات).
يا طويل العمر سمعنا ان بيطرحون اسهم ماكدونالد وكنتاكي وبيتزاهت وهارديز.. وكل ما يؤكل حتي كافتيريا بسم الله.. للاكتتاب بعد الصيف ، وان عمارات واراضي علي الكورنيش بيتم بيعها مع نهاية السنة ، وبعد هناك مجمعات كبيرة بيتم افتتاحها وبو سالم بيشتري محلات كثيرة وبيفتح فيها محلات بمستوي عال وراق. (هذا كلام بعض مروجي إشاعات رجال الاعمال واشباه التجار).
شفتي تسريحت نوال الزغبي الجديده واجد حلوه بسويها في عرس أمون بنت ولد خالي شهر 9 لا وفستان شيرين في سوبر ستارواجد عاري اللي ماتستحي.. سمعتي شريط نوال الجديد يقولون حلووووي شوفي حلوم قناة نجوم نجول مطرشتلي مسج ..شفتي التنزيلات في الستي واجد الاسعار رخيصه بس مااقدر اشتري الا الشيء الغالي تبغين صديقاتي في الجامعه يقولون انا ريم شريت من التنزيلات . (خرابيط بنات ما تنتهي).
شفت خلود شاري سياره همر ويدور في الفريج من يدخل يسد الطريق كله ونصور اخته اخذت ليسن ودور من مجمع الي مجمع ، طالع مع رشود بالسيارة البورش احسن من سيارتك البيجو اللي تفشل عاد غيرها عشان نطلع معاك واحنا مرفوعين الراس يا معود ها شرايك نروح دبي نهاية الاسبوع بس علي احسابك لأني مفلس خلا ص افا عليك واسكنك في برج العرب ..

الشباب وما أدراك ما الشباب

نشر في عام

2004