ابو شلاخ

المكان: مجلس حمدان في ابوظبي.

الاشخاص:حمدان و حميد +ابوشلاخ+مشاري.

حمدان:سير يا حميد جيب بطاقة (الجزيرة الرياضية) من نبيل السواق،سير يا ريال مباراة ايطاليا و الاسبان بتبدا ،سرعه سرعه.

حميد: ساير،وش لك في يورو، شوف مباراة المحلية واجد عليك (ببلاش)، الا سير عدل البطاقة الا (ادفع) كل كم شهر.يلا ساير وش يفيد الكلام يا ريال.

حمدان: قووووم بلا رمسه زايده.

ابوشلاخ:احنا عندنا في (قطر) بطاقات الجزيرة (بلاش)حق كل (مواطن) ولكل (بيت) يطلع لهم بطاقتين مع علبة من المخمل البرتقالي الراهي وفوقهم شريطه بيضه معاها (بروش) البطولة و كتيب معلومات عن البطولة.

حمدان: صدق يا ريال،وش هالفخامة، شكلي بحيد اعيش في (قطر).

ابوشلاخ:لا أنت بتكون (مقيم)،هذا بس للمواطنين سياسة(التقطير) يبون يثقفون الشعب كروياً قبل كاس العالم 2022.

مشاري:يا معود هالبطاقات صداع راس،ويبيلها ميزانية كل بطولة جدد ادفع ويطلعون لك (نصابين) في الديرة كل من يحط سعر على البطاقة الا 50 دينار الا 30 والرخيص تلاقيه مضروب ،عنده البطاقة من كاس العالم 2010.

حمدان:انا ارسلت نبيل الدريول، 3 مرات يفعل الكرت في ابوظبي واخر مره راح دبي ونسى الرجال ان يوم جمعة وهذا المحل مايفتح .

مشاري:ياعوينه ،كان دق لهم يسالهم فاتحين ،راح بهذا الحر، ماسك خط لدبي استوى دياي مشوي صاحبنا.

حمدان:او او مررها باااص يلا...شكلها قول،لا لا لا يقطع الارسال ، وش هالحظ اوووف.

ابوشلاخ: عندنا في (قطر) ياحمدان مايقطع الكرت كلش،ومن سرعة النقل ما نقدر انتابع الهجمه الا في الاستديوا التحليلي يعيدونها لنا بالحركة البطيئه،لا و ازيدك من الشعر هدف.

حمدان: زيد يا ولد الاجواد،صج كرما معاكم الجزيرة الرياضية.

ابوشلاخ:قبل كل بطولة يوزعون علينا قمصان الفرق اللي نشجعها،شف هذا (تي شرت) اللي انا لابسه لمنتخب ايطاليا من الجزيرة (هدية)،مايقصرون معانا اخر (دلع)في كل البطولات.

مشاري: اكيد مايهم الربح من هالبطاقات ،ماشالله الجزيرة الرياضية (اعلانات) طول الموسم بالملايين،يعني مو محتاجين (هالفليسات) من (فقراء) الارض،والله يامعود لو خلوا القنوات بلا تشفير وافتحوها و اكسبوا من الاعلانات كان ...

حميد: كان اكسبوا دعوات ملايين المسلمين العرب،بلا هالدعوات من قهر (التقطيع) و (التشفير).

ابوشلاخ:لا ليه مب فاتحينها (جمعية خيرية)،هذا حق من حقوقها،بس اهم شي مدلعين (اهل قطر)، لا تقطيع ولا دفع وبعد يبثون لنا قبلكم بخمس دقايق.

مشاري:قول لهم وش قلت لي عن خدمتهم الخاصة لاهل (قطر).

ابوشلاخ:هذا سر ،بس يلا مافي سر على الشباب.

حمدان : يلا قول ، انا اشهد انك ريال يا مرحبا الساع بك منور ابوظبي .

ابوشلاخ: تسلم يا راعي الواجب،عندنا قناة( بلاس اوردوا )،هالقناة ينقلون فيها المباريات مع تعليق باللغة (الاوردية) حق (الهنود) ،تعرف عندنا في (قطر) اكبر جالية الهندية، ولما نسهر بالمجلس ، نفتح القناة بجهاز ثاني بره حق المقهوي و الصبي ، عاد بعدها يصير النقاش والتحليل .

مشاري: شغل عدل .

ابوشلاخ:صار عندهم شلة معجبين بحارس السد محمد صقر ، يقولون (تير) سيم سيم (سكر)، يعني يطير مثل الصقر.

حمدان:عيني عليكم باردة ماشالله.
   ابوشلاخ: اذكر ربك، هذه رفاهيه للمواطن القطري




يوم مـــؤلـــــم

نور:يمه تكفين خليني اروح (فيلاجيو)اتغدا مع رفيجاتي مهوه وندوي و عوش الله يخليج..
الام:قلت لج مافي روحه يا نوروه، انتي غايبه عشان تدرسين للامتحانات مو تروحين تناقزين ، ذول الكسلانات السنة بسنتين بدراستهم، ادرسي يايمة محد بفيدج الا دراستج.
نور: تكفين ماما خليني اروح اعزمهم على حسابي ، والله بيدعون لي وبنجح.
الام : ماشالله مع رفيجاتج كل وحده فيهم ماتخلي سجادتها ولا القبله دعائهم ماشالله بحرر القدس.
 نور:خليني اروح يمة مع اخوي عزوز ، ماراح نطول بس ساعة وبرجع ، وبجيب بهالماده امتياز صدقيني.
الام:لا عزوز ولا غيره، الحين الساعة 11ونص وش هالغدا،لي جات حجزت الغدا افكر.
نور:ياويلي ياويلي،يمه يمه يمه لحلقيني.
الام: وش فيج يا مصرقعه؟؟؟مع هالغبر اللي بيدج.
نور:جايني في (بي بي)حريق في (فيلاجيو)، لا شكله اشاعة، لالا ما اصدق.
الام: اكيد اشاعة من هالغبر،كل يوم تكذبون علينا، ذاك اليوم قلتيلي افتحوا (هارودز) في طريق الشمال،وطقيت الخط ولا فيه شي.
نور:يقولون في حالات وفاة ،يقولون في حضانة اطفال، يقولون من مطعم لالا يقولون ...ياويلي حرام المبنى صج محترق ما اصدق،شوفي يمه الصورة.
الام: ياكبرها عند الله وش تخربطين يانوروه حضانة في (فيلاجيو) من متى؟؟ ماشفتها كنت حذفت اخوج فيها واحنا نتسوق ، مطعم يمكن غاز ماسكره الهندي عدل ولع لهم المكان، لا اشاعة صدقيني.
نور: فصول مادريت يقولون في حريقة في (فيلاجيو).
فيصل: روحي زين لا تخربطين علي توني قايم مخي (مقفل)مالي خلقج يا ام السعف.
نور: كيفك انا ما اكذب ،افتح جهازك و أسال ربعك.
فيصل : ماشحنته من امس، الشاحن نسيتة في مجلس عمي.
نور: يقولون لا تزحمون شارع الوعب عند (فيلاجيو) عشان تسهلون على الاسعاف و الانقاذ.
فيصل:يلا بروح (اتفرج) و (اصور) حق الربع في الفيس بوك عطيني (اي فونج) يلقط صور حلوه،فوني طايح من (مخباي) في الكورنيش امس ،(منشلخه) الشاشة.
الام: نور حطي (تلفزيون قطر) خل نشوف الاخبار صج هالوفيات؟
نور: وي يمه من صجج (تلفزيون قطر) خبر خير من برنامج لين اغنية ولا كانهم موجودين في (قطر) اصلا.
الام: لا حول ولاقوة الا بالله ، يحطون لج (اخبار) كل من هب ودب ،ابرك نفتح لنا قناة (نسوان الفريج)تغطي اخبارنا.
نور: حطي يمه قناة (المتربصين) بتلاقين كل اخبار (قطر) عليها.
الام:يارب.. سترك، يارب.. لطفك ،عين ماصلت على النبي، نور يمه لايكون رفيجاتج راحوا (فيلاجيو)،اطمني عليهم.
نور: لايمة أخرتهم الدكتورة في الساعات المكتبية وماراحوا ..
الام: زين الحمدلله، الله لطف بهم، قولي لهم يصلون (صلاة شكر) لربهم.
نور: يمه اعزموا بعض على (نسكافية) الجامعة اللي كله ماي من غير طعم  و اكل من كافتيريا الجامعة، حلفوا ان (مايتبطرون) على النعمة.
الام:الله يعينهم على (المغص).
نور: يمة يقولون في مؤتمر الساعة 8 ونص.
الام: زين يابنتي، (صباح الخير) تو الناس زين (افطنوا) .
نور: وش هالصوت التعبان في المؤتمر،اعنبوا (مكرفون) واحد وفيه (غبار) يخرخش. .
الام: لا حول ولا قوة الا بالله،صكينا (صوت) التلفزيون حده ،بكره خل نشتري (تلفزيون) ثاني شكله (خربان)  ما اسمع، سمعي (ثقل) شكله.
نور: لا يمه البلا مو في جهازنا، البلا في (ميزانياتهم) اللى ما ادري وين تروح وكل شي (ردي) عندهم.
الام : الله يرحمهم ،لاحول ولاقوة الا بالله، انا لله وانا اليه راجعون، بس يا نوري حبيبتي لا تبجين.

*(صورة واقعية) لما حدث في يوم (الاثنين الحزين) الجميع متخبط و الاعلام المحلي (تلفزيون قطر) اثبت ان خارج (الزمان) و (المكان) و (الحدث)
حتى في المؤتمر الصحفي كان لهم النفس الاخير وكان GAME OVER


شباب المدارس الحكومية

يوسف:ليه زعلان يا عثمان؟كل شي ولا زعلك يا اخوي؟

محمود: شو هاد يا زلما؟ شو بيك؟
عثمان: لا لا عصمان ولا زفت ياراجل.
يوسف:صب يا حمزه شاي زعفران زيادة سكر حق عثمان،روق وانا اخوك،ومالك الا الطيب.
عثمان:يابويعقوب ،كولينا في الدوحة مين اكتر من تلاتين سنة ،بنحب هاد البلد،ونعشقها، واليوم داير يقول لينا وكمان ينشروا في القرايد،ابناء (الموووقيمين) يشوفوا ليهم مدارس خاصة ،غير مسموح تواجدهم داخل (المستغلات) في الدوحة الجميلة و برات الدوحة مسموح في البعض منيها.
محمود: ياعسمان شكلك قريت اقبل ماتشرب فطورك المزبوط.
يوسف: لاحول ولاقوة الا بالله،اصدق هذا مجلس التعليم،قراراتهم عنصرية تعسفية.
مصطفى:ايوه صحيح،شفتوا (الجدع) اللي دفعهم عشان مش عايزين يعتمدوا شهادته الماجستير، دول مش بيدعموا التعليم خالص دول (ضد) التعليم اصلاً .
عثمان: دول داير يزيدوا (الامية) ،و يفشوا (الجهل)، ونرجع بعدها فصول (محو الامية) يا راجل.
مصطفى: اه صحيح يا ابو يعقوب، زمان كنا كلنا في مدارس الحكومة، لا بنعرف ده (مقيم) ولا (قطري)،كلنا بنتعلم مع بعض ونحب بعض كلنا عيال (الفريج) في قاموس طلاب مدارس الحكومة.
محمود:يسلم تمك يا درش، كنا بنتعاون مع بعض ،نقضي السهره مع بعض،كنا بنأجر فيلم اسبوعياً من فيديو بسوق العلي بعد ما نجمع مصروف الاسبوع عند عسمان (حصاله الشلة)، ونسهر عند ابويعقوب في مجلس ابوه يكون في (الحداق).
عثمان: وكلنا صرنا انتحجه (قطري) ونحكي (فلسطيني) و نصرخ (بالمصري) و نغني ( البامبو السوداني)ولا كنا بنفكر بهيك تفرقه.
يوسف: طول عمرنا بقطر نحبكم وبنبقى نحكبم، وهذول اللي ماسكين التعليم بيهدمون و يردمون روح (الامة العربية)في مدارسنا،بسبب خطط اي كلام.
عثمان:شو هادا التعذيب انا في (الدوحة) و ابني بروح (مسيعيد)يدرس هونيكا ليه ان شالله، على كده ارسله امريكا عند عمه ولا اخليه يرجع السودان عند جدته ستونا، احسن ليه.
محمود: ليك ليك ليك شوف مين متلفني، يا الله صالح .
مصطفى: هو فين ابو الصلح من اكتر من عشرين سنة لما خلصنا الثانوية العامة ومش باين.
يوسف: الله يذكرة بالخير صالح، من تخرج راح اليمن تزوج و زرع ارض جده بذاك الرمان و الفواكة الطيبة و يصدرها للخليج،ماشالله صار (تاجر) الله فتحها عليه من وسع.
عثمان: يستاهل هذا الزول والله كان نعم الصاحب يأكلنا ويجيب لينا، كل يوم في باص المدرسة الخبز المسمسم و الحليب اليماني.
محمود: بيسلم عليكم وجاي الاسبوع الجاي .
يوسف:حياه الله.
عثمان: يا زول قول ليه؟شو اعمل ، راح ارجع السودان.
يوسف: لا يا عثمان ،مصاريف عيالك علي،بس لا تتركنا.
عثمان: تسلم يا ابن الاصل و الكرم،بس صعب رايح بلادي هالصيفية.
يوسف: حسبي الله عليهم اللي فرقونا، بقوانين مالها اساس.
مصطفى: لا يا ابني ،ده اسمه (تقطير).
يوسف: لا يا الغالي التقطير المفروض يكون في (العمل) مايكون في (التعليم) اللي يجمع ويقوي العلاقات،اللي يسونه (تعتير) و (تعرية )افكار المفروض نوثقها بالجيل ان جميع العرب واحد واخوان.
عثمان: هذا الكرك القطري بيخليني اغير فكري ، ما قادر اسيب قطر يا رجل.
يوسف:الله يخلي الكرك اللي بيخليك تغير رايك، بس يا الربع قد سمعتوا عن (مواطن قطري) راح يدرس في (امريكا) ماخلوه يختلط مع الطلاب الامريكان لان (مقيم).
عثمان: تزكروا ياشباب (الفلافل) في (شارع الريان) ايام زمان.
مصطفى: ايوووووووه...
*هامش: يوسف(قطري)+مصطفى(مصري)+محمود(فلسطيني)+عثمان(سوداني)+صالح(يمني)=شلة شباب اصدقاء في العاصمة (الدوحة) من مدرسة (حكومية) في مدينة خليفة .( في يوماً ما) من الزمن الجميل.
النهاية2012 


يوم قطري طبيعي 2-2


ابو حسن: ول ول ول وش هالحر درجه الحرارة 40،ياحرام يا السيارة نشتريج بثمن غالي و مافي شي يحميج من الحرارة.



شيخة: اسم الله عليك يبه،وش فيك.؟

ام حسن: استخف ابوج من الحر، سلط الله عليه جاي من (السويد).

ابوحسن:وين عيادتكم هذه؟خل احذفكم؟و اروح اقرب كافتيريا اشتري لي (كرك) و (كلاب سندويش)، الطباخ رايح النهائي ومخليني اولي من غير اكل خفيف بعد الظهر؟

شيخة: ماشالله عليك يا يبه ، امداك هضمت اكل الغداء (ثريد) و (مشخول) ثقيل غير غثه الدوام طلعوا عيني هالمدرسة ولا المديرة ماتدري وين الله قاطها.

ام حسن: صوب المنتزة روح هناك وبدليك.

ابو حسن: كله عيادات و مراكز صحية هناك،مكدسينهم هناك ما ادري ليه؟؟

ام حسن: يمين بعد يمين بس بس هني، يلا شويخ انزلي، انطرنا يابو حسن ماراح نطول.

ابوحسن:خير ان شالله، سويلي رنه وبجيج.

بعد ساعة.

ام حسن: مابقى دواء ما حطه لي، وفي الاخير طلع (اخوه) صاحب الصيدلية صج نصاب.

ابو حسن: اجر و عافية يا ام حسون.

ام حسن: توكل على الله صوب (سوق واقف) نخلص شغلنا.

ابوحسن: يقولون فاز الغرافة في (الريد يو).

ام حسن: زين يستاهلون.

ابوحسن:يا الله وش هالزحمة دخلنا في المسيرة بالغلط.

ام حسن: لحول ما تعرف تروح من ورا للازم تيجي من (الكورنيش) وانت عارف ان فيه مسيرة.

ابوحسن: وش عرفني، يلا خل نتسلى مع الشباب لحد مانوصل.

ام حسن: وين الوناسة الا (صرقعه) ما بعدها (صرقعه).

ابوحسن:يمه شويخ ليه تبجين فيج شي؟؟ليه مضايقة.

ام حسن:وي مادريت يا بو حسن، حدسي صدق بعد هالسنين.

ابوحسن: ليه وش صاير؟عسى ماشر؟

ام حسن: تذكر يوم قلت لها قبل ماتدخل الجامعة لا تدرسين (تربية فنية) مالها مستقبل ؟

ابو حسن: اذكر وكلنا قلنا لج (الرسم) فن وخلي البنت تسوي اللي تحبه.

ام حسن: هذا هو سوت اللي تحبه والحين بيلغون (الرسم) من المناهج وبتصير بنتك بلا شغل.

ابوحسن:ليه وش فيه (الرسم) حرام ولا بدعه،مايفهمون قيمة الفن ، الله يرحم (الفراعنة) وحضارتهم،وش فهم اللي طلع هالقرار.

شيخة: شوف يبه شعار نادي الغرافة (خريطة قطر)وفيه رسوم داخلة و اللوان،بكره الصغار لا راح يعرفون يرسمون (خريطة قطر) ولا يعرفون الالوان كيف يمزجونها ويلونونها، ويعبرون على نفسهم بلوحات فنية وتشكيلية،ماتبيني انقهر هذا (الفن) يبون يهمشونه ويلغونه. قهررر يايبه.

ابوحسن : معليه يا يمه يابنيتي لا تزعلين، بخليج ترسمين على طوفة البيت من داخل، ارسمي امج وهي تتكلم في التلفون واخوانج وهم نازلين من الباص،لا تحرمين عمرج.

شيخة: يبه لا تطنز عليه، جد تحطيم ،كل شي يصد مونه فيه بهالوقت.

ام حسن: قلت لكم تعلموا لغات تصيرون مترجمين للعماله الوافدة.

ابو حسن: يلا وصلنا (سوق واقف)،بس مافي مواقف.

ام حسن : صف على الرصيف فوق، لاهين مع المسيرة المرور.







يوم قطر طبيعي 1-2


اليوم: السبت 12-مايو- 2012.

الوقت: الساعة 4 عصراً.

المكان:بيت ام حسن+ كورنيش الدوحة.

الاشخاص:ام حسن، ابو حسن ،ابنتها شيخة ، +السائق (محمد اشرف).

ام حسن: جيب السيارة يا (محمد اشرف) بروح الدختر و السوق.

اشرف: ماما انا في داخل (استوديوم)داخل شيخ (كاب).

ام حسن:حسبي الله عليك وش موديك هناك،ماعندك اجازة اليوم.

اشرف: ماما (ملين)واجد هدية داخل هدا يوم، (تكت) رخيص فلوس كتير.

ام حسن:يا اشرف ياربي منك، قول حق (نصير الطباخ) يسوي عشاء حق بابا.

اشرف: ماما كله هندي داخل فريج كلو (باتجا) داخل بيت (ناو) داخل (استديوووم).

ام حسن: الووو اشرف، اي باتجا ياويلي عيالي من (حسون و عبود و فصول).

اشرف: يس ماما كلوا داخل استديوم ويذ (قرافه) بليس .

ام حسن : على كيفك وديتهم،الوووو اشراف، صك الخط بوجهي.

ابو حسن: وش فيج ؟ تصرخين؟الواحد تو قاعد من النوم وتصرخين.

ام حسن: اشرفوه ذالف مع اليهال رايح النهائي.

ابو حسن: والله ان احسن مني اشرفوه اخذ العيال تقولين عياله.

ام حسن: انت خلك ربي بكرشك؟تقول بطن حامل .

ابو حسن: على طاري الكرش، قولي للطباخ يطبخ لي العشاء برياني لحم و صالونه خضار و سمبوسه بطاط و فطيرة سبانخ حق الحديد وكفاية ومعاهم سلطه و روب اهضم بهم.

ام حسن: ماشالله عليك كل هذا بوفية، الطباخ رايح معاهم النهائي.

ابو حسن: نصيروه رايح ليه ما اخذ اذن مني، وش يوديه لحول،ادفع له معاش عشان يروح يحضر المباراة ولا يطبخ لي.

ام حسن:الحين ما هموك اليهال همك نصير، ليكون هو ولدك؟ لا سمح الله.

ابوحسن:روحي زين العيال ماعليهم شر ، خل يتعلمون يحضرون المحافل الرياضية، ولا نصير وش له بالكورة خله مع البصل و الطماط حده.

ام حسن: خلك من البربره اللي مامنها فايدة،قوم ودني الدختر.

ابو حسن: وش دختره بعد يا حرمي المصون؟؟؟

ام حسن: خليتوا فيني شي صاحي انت وعيالك.يلا قوم ودني نص ساعة و اجهز انا وبنتك شويخ؟.

ابوحسن:ان شالله على امرج ، ولا حول ولاقوة الا بالله.

ام حسن: وعقبها بنروح (سوق واقف) ناقصني بزار و لومي اسود.

ابوحسن:وش هاليوم الاسود، سبت زحمة السوق.

ام حسن: كيفك بيقصر على اكلكم.

ابو حسن : لا لا خلاص اوديج السوق ، هو فاضي اليوم.





تاجر طل - طل تاجر

طالب جامعي يقوم بأنجاز بحث ميداني ،الموضوع(تراجع المشاريع التجارية الصغيرة عن العقود الماضية؟لدى المواطن القطري)

اسم الطالب:محسن حمد. التخصص: ادارة اعمال.

(1)

المكان:مقهى شعبي.

محسن:مرحبا يبه، معاك طالب جامعي اسوي بحث وعندي كم سؤال ابي اسالك اياه، ممكن.

المواطن: تفضل وانا ابوك، نرحب بالعلم و العلماء الصغار.

محسن: الله يخليك يبه ،ممكن تعرفنا باسمك وسنك.؟؟وهل لديك مشروع تجاري سابقاً او حالياً.

المواطن: معاك ابوك بومبارك ،العمر قبل ماينولد ابوك،كنا من التجار الهوامير بس وين الحين، خلو لنا مكان هوامير الملايين.

محسن: شنو تقصدك يا يبه بومبارك.

المواطن:اول خل اشربك كرك على حسابي ما تقول بومبارك بخيل،وعقب اقولك.

محسن: مشكور يبه ، مسوي دايت، لو مصر شاهي من غير سكر.

المواطن : حمدي جيب اثنين شاهي واحد بدون شكر والثاني حط به دبل شكر.

محسن: انزين يا يبه قولي شنهي مشاريعك؟

المواطن: وانا ابوك كان عندي معصرة فلافل وعصير رقم واحد في شارع الريان والحين وينه شارع الريان (هردموه) المفروض يكون معلم وشارع اثري بس راح و راحت تجارتنا وذكرياتنا.

محسن: وليه يا يبه ما اخذت في مكان ثاني.؟

المواطن : وين يا بوك هاليومين، صير (تجار طل) عشان تدفع الايجار للاهل العقار ولا التاجر الفقير المسكين اللي على باب الله (ياكل هواء) بطنه انتفخ من اكل الهواء وانا ابوك.

محسن: كيف يا يبه؟ الايجارات معقوله ؟ وكل المسؤولين يقولون؟ بس الكسل من المواطن؟

المواطن: صج والله ، لو كلامهم صح ، انا بو مبارك كان عندي معصره و حلاق و خباز و دكان كان يجيب لي ذهب و الايجار معقول الله يرحمك يا بو سلطان مب الحين ولده اسليطين رفع الاجار من الفين ريال ل20 الف ريال في يوم وليله ، لي قلت له ليش يايبه هذا رزقي، يقولك غلاء معيشة ، راحوا الطيبين، وظهره قوي لان (القانون) حامية صاحب عقار وحلال.

محسن: بس كل شيء صار غالي؟؟

المواطن: ابوك في الجنة، صح يا يبه، بس ما يحكرون لك ، ويسكرون كل الشوارع التجارية و كل شي ممنوع ولا ، ليه مافي دعم للمواطن العادي تجارياً، اذبحونا الهوامير اجاراتهم في السماء ، ليش وش هالطمع ، عسروا علينا والله.

محسن: يعني نطلع بأستنتاج يا يبه، قلة الشوارع التجارية و جشع الهوامير؟؟.

المواطن: ايه وانا ابوك استنتاج و واقع وكل اللي تبية ،قول يارب.

(2)

المكان: مجمع تجاري

محسن: مرحبا اختي ممكن اسالج كم سؤال عندي بحث يتكلم عن المواطن القطري وقلة تواجده في التجاره؟

المواطنة: اكيد اخوي تفضل ،يا حر قلبي وين التجارة؟

محسن: هل لديكِ تجارب في التجارة الصغيرة في البلد؟

المواطنة: اكيد لي اخوي بس ماعندي مكان والله يخلي النت و البلاك بيري، مع الاسعار الخرافية للايجارات و قلة الشوارع التجارية اللي هدموها كلها ويقولون لنا هذا المتوفر، ياحر قلبي حراه والله يا اخوي؟

محسن: وايش مجال تجارتكِ اللي بديتي فيها ؟

المواطنة: الله يخلي صديقتي سارونة عندها موقع و مسويه لي صفحة في فلكر و فيس بوك (ببلاش) من غير مقابل يكسر ظهري،دخلت مجال الاكل وسميت الموقع( بلعة وبس) سويت (كاب كيك و خنفروش و سمبوسة صغيرة و حلوى هندية) من اختراع خدامتنا وعليها طلب رهيب وبعد كان عندي تجارة حرة مثل (اقلام) تعلم الاطفال الحروف الابجدية من غير معلم وبعد (عطور عربية و فرنسية و اندونيسية)أجيبها خدامتنا لي سافرت بلادها عليها اقبال ( غير طبيعي).

محسن: ماشالله اختي وكل هذا وما قدرتي تفتحين بوتيك في مجمع ولا محل في اي مكان؟

المواطنة : لا يا اخوي وين افتح الاجارات غالية واللي اكسبة بروح في (بطون) الهوامير، خلنا على النت و اعطي المندوب 50 ريال كل شهر، واجد ابرك .

محسن: يعني اختي اطلع بأستنتاج من كلامج ان السبب قلة الشوارع التجارية رخيصة الثمن و جشع الهوامير.

المواطنة: طبعا اكيد اخوي و مافي غير هالسببين ، والقانون بصالحهم قلباً وقالباً .





(3)

المكان : محطة البترول.

محسن: السلام عليكم اخوي ممكن اسالك كم سؤال عن الاعمال التجارية الصغيرة وقلة اقبال المواطن عليها اليوم؟

مواطن شاب: تفضل اخوي حياك الله، توني اهوجس، جايب (تواير)من الصين شحن خاص، ولا عارف افتح محل ولا عارف اسوي شي؟كله من رحنا لهم بمكان قالولي (غير تجاري) ولو لقينا تجاري وهذا من (المستحيلات) وان لقيت وعلى قولتهم (شارع تجاري)، تعال شو ايجاراتهم يامال العافية همجات تكبر (كروش) الهوامير.

محسن: وشنو سويت بالتواير؟ كيف بتبدأ التجارة هذه؟

مواطن شاب:والله يا اخوي خلها بيني وبينك خالتي اللي عايشة في الكويت يسون (السرداب) في البيت صالات عرض تجارية و يكدون خير من هالسالفه،الوالدة الله يطول بعمرها اقترحت علي اقتراح نسوي (حوش البيت) معرض تجاري في حوش البيت يومياً من (الساعة 4 العصر لين 8 المساء) النسوان بصوب و صوب الثاني للشباب، وندفع للوالدة على الطاولات و الكراسي مبلغ شهري 150 ريال والباقي حق اللي يبيع، شنسوي تساعدنا ندور لنا دخل بديل للاهل الفريج، تعبنا وانا اخوك نبي (بيزات).

محسن: نوصل للاستنتاج اخوي ان السبب قلة الشوارع التجارية و غلاء الايجارات بشكل كبير.

مواطن شاب: ايه وانا اخوك ، قول غلاء فاحش و غلاء جنوني و انقراض الشوارع التجارية بفعل فاعل.



فايز كاري 2-2

 
فايز:يلا قولي وش اكتب في الورق، والله ودي اشتغل في مكان كله سفر ومن طيارة لي طيارة و اللبس جاكيت عليه شعار (قطر) في الجو، ما ابي اكون (طيار) حتى لو اكون خادم مضيف مب خادم مسافرين بس اسافر..اه ياااابااااي على الاحلام.

ناصر: افا عليك عطني هالورق الاصفر واكتب كل الاشياء الاولية من (الاسم و العمر وخلافه) بالعربي اطبع بطاقة الشخصية، عقب عن خانة اللغة اكتب الاتي لغتي الام (الاوردية)اجيدها تحدث و كتابة ثم (الانجلواوردية) ولا اجيد اللغة العربية بتاتاً،اكلتي المفضلة (كاري بالفلفل الحار جداً)ثم (البرياني مع ربيان المحيط الهندي).

ناصر:ماخلصنا لي جيت تروح المعرض عند مكان تقديم الطلب،اللبس بنطلون رصاصي و بلوزة كاروهات فيها (احمر واخضر و بني و ازرق و بنفسجي) واهم شي (الابه) تكون بيضه دليل النظافة .

فايز: وين القاه هذه العفيسه.

ناصر:دق على سواقكم هو بجيبه لك بس عطه مقاسك، خل اكملك وتشتري جاكيت عنابي وحط عليه بروش صورة غاندي.

فايز: لحول وين اجيبه؟

ناصر: كلم اختك الصغيرة اميره،قول لها تطبع لك صورة غاندي من النت ،وقصها ولصق من وراها دبوس ، وقزه في الجاكيت.

فايز: عندي ثوب اليوم الوطني عنابي ،يصير اقصه ويصير جاكيت.

ناصر: احسن واحسن ينفع عشان يبين صناعة آسيوية معتبره.

فايز: والله حاله ، كل هذا عشان اللقالي وظيفه ، اطيرني بين السحاب.

ناصر: طبعا اللعب على الموجه دام خاطرك في وظيفه فيها سفر في الاجواء العالمية طوال السنة وبتحصل على تذاكر ابلاش حق العائله وحق خويك (نصوري).

فايز: وانا اشهد بغركم هداية ،بس خل يقبلوني.

ناصر: بس اخر شي قبل ما انسى ، تشتري (زيت تاتا) وتدهن به شعرك في الليل والصبح قبل ماتروح المعرض،ولا تنسى تنفخ (كرشتك) لي اقبلت عليهم لانها من علامات الجوده وكثرت اكل العيوش .

فايز: هذه يبيها تمرين عشان اضبط الدور، ماكن ادري ان كل الشغله تمثيل في تمثيل.

ناصر:لك خاطر تقدم في شركة ثانية.

فايز: ودي اصير للاعب في (لخويا) ليه انت بس يجيك عرض من (الجيش).

ناصر: يا غيار، هذا مكانة مب هني، هذا بعلمك عليه بكره ، يلا روح الحين، انا وراي مشوار بجيب الاهل من فيلاجيو، وبعشيهم في مطعم هندي.

فايز: جيب لي معاك تيك اوي و نزله في بيتنا.

ناصر: ابشر ، بجيب لك كاري اللي تفوح ريحته لي بكره وتصير الطيار (فايز كاري).



فايز سي في 1-2




المكان :مجلس ناصر.

الاشخاص: ناصر + فايز (اصدقاء).

الحوار:كتابة )سي في) للمعرض المهني.

فايز:جيتك على وعد البارحه،تعلمني كيف اكتب (سي في)حقي للمعرض المهني ،ياما كتبت السنوات اللي طافت ولا في امل،انت من اول سنة لقيتك لك وظيفة (يا مال الضعفه).

ناصر:ماشالله يااااخي (من شر حاسد)،ما ادري ابط عينك (المبققين)هذول.

فايز: جبت معاي ورق سنع يعجبك من كل الاشكال مريت المكتبة.

ناصر:الله يرحم ايام المكاتب الفتى و ربعها؟راح وطرهم الحين في الفلاشات وخلص امورك يا الحبيب.

فايز: صبر عاد اوريك الورق السنع (ورق اصفر)مال رسايل الهنود ،ورق فاخر يقولون يكتبون فيه رسائل الديوان ،ورق ابيض مخطط مال ابحاث المدارس الحكومية سنة الطبعة، اللي يسمونه (فول)ما اعرف شنو.

ناصر: ماله داعي هذا كله يا ولد الناس.

فايز:انت وش فهمك ،لازم ادخل المعرض و انا ماسك الظرف مع الرزه و الغتره منشية من الصبح وافتر من مكان لي مكان داخل المعرض.

ناصر: لا بالله عرفت ليه ما اقبلوك من اول معرض لين اليوم، الحين وضحت الرؤية وضوح تام.

فايز:يلا شنو ابدا فيه اكتب اسمي و سني و مهنتي و شهادتي صح ولا انا غلطان.

ناصر: صح بكل شي بس مهنتك شنهي بالله عليك انت تبي مهنة عن الذكاء الزايد اقول.

فايز:اكتب باللون الازرق ولا الاسود ،الاسود اكشخ على قولتهم (ملك الالوان).

ناصر: اعنبوا غيرك،بتشتري نعال ولا سيارة ؟كلها ورقة (سي في) لا راحت ولا جات.

فايز: وش فهمك هذه تعبر عن الشخص ومكنوناته وتعب السنين.

ناصر: طيب يا النجيب ، لاتنسى ترش العطر على الورق.

فايز : الاسم : فايز عزيز، خريج ثانوية حكومية و جامعة...

ناصر: الا صج ليه اسمك (فايز) من اللي سماك هذا الاسم، ماقد شفتك (فايز) من عرفتك طول حياتي،حتى في الابتدائي اللي كلنا يعطونا هدية على الطابور انت ماعطوك ولافزت، يوم لعبنا في كرة قدم في الفريج انت الوحيد اللي اكنسرت رجله من بد خلق الله.

فايز: عجبني سؤالك،شوف ياطويل العمر سنة 1984 الغالية الوالدة كانت جايبتني على وجه هالدنيا في (مستشفى حمد) بس يومها كان في (سرير)، مو مواليد هالسنين ينولدون في الممرات، الا يحطون مسلسل جديد ذاك الوقت ،وامي و ابوي حيرانين فيني شنو يسموني كانوا بسموني (خان) على الدكتورة، الا يطلع مسلسل(فايز التوش) ويسموني عليه.

ناصر: من (خان) الى (فايز) ياقلبي لاتحسن كان شغل مخه ابوك شوي وسماك (غانم) على (غانم السليطي).

فايز: دقيقه خل ارد على الجوال اختي (فوزية)الو هلا..مشغول مع نويصر اكتب سي كي ،سي دي.

ناصر: يا الثول (سي في).

فايز: اقصد (سي في ) ال (في) حق (فات مان) فهمتي، ساعتين وجايكم.

ناصر: (بات) هي (في) لا بالله انك مخ ، طيب ليه ما تزوجني اختك فيوز؟

فايز: اختي (دكتورة فوزية) تجوزك انت؟ياللي ما خلصت الاعدادي؟مايجوز انت بنفسك ماترضى.

ناصر: لا ارضى انا مع تعليم النساء بالعكس.

فايز: يا العيار يا نويصر تبي فلوسها،صج هي تحصل على همجه.

ناصر: يحصل لها واحد مثلي يشتغل في شركة النفط وقريباً بيصير للاعب احتياط في الجيش جايني عرض.

فايز: الا صج اعدادي ولقيت لك وظيفة في شركة بترول في المعرض الاول وانا شهادة بكالوريوس من (جامعة الشهيد الله يرحمه) ومب لاقي لي وظيفه لين هذا المعرض واقعد انطر كل (ابريل) ويطلع (كذبة ابريل) على قولة الوالدة، هم لو يغيرون الشهر كان عينت من الله خير.

ناصر:الدنيا حظوظ عاد انت لا عندك لسان حلو ولا تفهم في الكورة وين تلاقي لك طريق في هالبلد، حتى (التيله) ما فلحت فيها نشغلك في (سوق واقف).





جدتي حصه

المكان:بيت الجده (حصه).
الاشخاص:الجده حصه +بنت ولدها نوير.
نوير:تقبل الله طاعتج يمه حصة،اصب لج قهوة.
الجدة:منا ومنج صالح الاعمال يا بنيتي ،جيبي ومعاهم (التميرات) احس بهبوط ما اكلت غداي اليوم،عمج منصور ماجه ولا عمتج وضحة رجعت البيت بعد الدوام.
نوير:ياحياتي يا جدتي ،اهم ماعليج صحتج،كان كلمتيني جيت اكل معاج.
الجدة: يا عيارة يا نوير، انتي ماتيجيني (الافي السنة احسنة)،و تكلمين ميري من وراي تقولين لها سويلي (بلاليط).
نوير: انااااا لا يمه ،ميري كذابة، انزين يمه وين عمي منصور و عمتي وضحة.
الجدة:عمج راح يشيل العنة اللي في مخيم سيلين قبل اول الشهر لا تروح عليه العشر الاف،مواعدني يوديني العمر اول مايقبضها.
نوير:والله جزاه الله الف خير عمي ،زين تذكر يشيل الخيمة ولا ان الجو حلو ومطر ينسى الواحد ،كانت راحت عليه .
الجدة: وعليه عليكم يانوير ، زمانكم غير شكل حتى البر ارض الله الواسعة صار كان (فندق) تحجز ولك وقت معين،شنقول غير الله المستعان، الجو ربيعي حتى (القيض) ماجه، خلوا خلق الله يشلون خيامهم.
نوير: لا جدتي في اسباب بيئية؟
الجدة:سلط الله عليكم بنات الجامعة كله كلامكم (تفلفس) و (مرادم)،امس جارتنا ام سعد تقولي في جامعة أدخل اللي عندهم شهادة ثانوية.
نوير: في،هذه يا يمة فكرة جديدة،يجبرون بخاطرهم،ان في جامعة ادخلهم اسمها المجتمع.
الجدة: خلاص بعطيج شهادتي تودينها.
نوير: شهادتج جدتي مب معتمده هذه من مطوع .
الجدة:المنة عليهم،شوفي وش هذا النادي اللي يلعب؟ولدج عمج محمد (عواس) بيلعب اليوم هو قالي شوفيني،اللهم صلي على النبي بحرف الخاء.
نوير:شنو نادية ياجدتي خريطيات ولا خور ولا شنو.
الجدة: ما ادري كاتبين الاسم بالكمبيوتر هذا خط عربي صعب.
نوير:لا يمه هذا حروف انجليزية مختصرين اسم الفريق.
الجدة:هو قالي لونه ازرق اكيد بس معاه يا احمر ولا ابيض ولا اسود ما اذكر.
نوير: يمه عندنا الحين فوق 12 نادي درجه اولى و بعد في درجة ثانية.
الجدة: وي من وين يجبون هذول كلهم عشان يلعبون.
نوير:يايمة وش اقولج خليني ساكته،يمه حصه سالت اخت عواس في بلاك بيري (عواشه )تقول ان اخوها يلعب في دوري الفرجان.
الجدة:يعني وين اسمعها على (الريديوا ).
نوير: لا يمة مالها نقل.
الجدة: اه يا الهيس يا عواس قص علي.

الوعد لندن

المكان: بيت اموله.
المناسبة: زوارة صديقات.
الاشخاص: اموله، جوجو،نوير.
اموله:الله شنطتج تجنن وش هاللون الفسفوري؟عجيب مع العباية؟
نوير: هذه سعرها عشرين الف ريال من فيلاجيو امس شاريتها،توها واصله لهم المحل كلموني ورحت شريتها على طول.
جوجو:مالت عليج صج انج (اي شي)هالمبلغ اشتري فيه تذاكر الصيف حق (لندن).
اموله: صج نوير كل فلوسج على الشنط ، حرام عليج؟سوي فيها شي مفيد.
نوير:هذا شي وايد مفيد، كل البنات يطالعونج ،والاهم(ينقهرون).
جوجو:نوير يا هبلة، الحين بتصكين الثلاثين،وليحين مالقيتي لج (عريس الغفلة).
نوير: وش دخل (لندن) في الموضوع الحين يا جوجو.
جوجو: انا اقولج (الله يسلمج) ماتشوفين المسلسلات الخليجيه و الروايات الخليجية كلها يقولون لج الحب في (لندن) و القفص الذهبي يدخلونه من بوابة (بلاد الضباب).
نوير: اه يا قلبي من صجج يا جوجو،صدقتي خبال المسلسلات .
اموله:صدق كلامها ،بنت جيرانا راحت (لندن) ومن رجعت تزوجت.
جوجو:تزوجت من؟لاتقولين (خدوج)ام شعر احمر.
اموله: ايه هي ماغيرها،اخذها ولد ولد جيرانهم.
نوير: لا تقولين لي ماشافها طول عمره وماشافها الا في (لندن)هذا صج بيكون فيلم.
اموله : ما ادري يقولون.
جوجو: شوفوا يا صديقاتي لازم نجرب (لندن)هالصيف شوفي المسلسلات و اسمعوا القصص،يعني اكيد في جوهم شيء غير،مب من فراغ هالسوالف.
اموله:هذا خرابيط كتاب يقولون (لندن) و(لندن) لان مايعرفون غيرها ،يعني زمان يضربون المثل في عنتر وعبله وقيس وليلى الحين الموضة (لندن) شعار الحب.
نوير: لا صدقوني هذا فكر سياحي جديد من الانجليز، خبركم احنا مانفهم الطرق الجديدة، خبيثين هالاوادم.
جوجو:يا حسرة قلبي كم شهر باقي على الصيف (لازم اضعف)؟