زمان التونه

العاشر من رمضان

2007

زمان التونه

في احدى جلساتي الرمضانيه مع الاهل كان في المجلس مجموعه من الرجال من كبار السن تقريبآ في منتصف الستينات جلسوا يسلموا على والدي و والدتي وباقي الاهل ، واحدهم وكان يتحدث عن زمان اول ورمضان وما كان يفعل هو واصحابه كما اطلق عليهم الشباب الضائع او الفاسد،فنطلق بوعبدالله بالحديث لما كان يجينا رمضان ايام اول مانقدر نصوم ونعتبر رمضان لملتزمين ولاكنا نصوم ولا نصلي بس في رمضان كنا نروح لمسجد عشان يشوفونا عيال الفريج وهم كلهم يعرفون ان حمود وصلوح وعلوي وعبيد كلنا مانصلي ولكن الصوم عندهم انا احنا نصوم،اول مايقرب رمضان نشتري علب التونه ويخيس بطنا من التونه حتى القطاوه تقرب منا بزود،ندخل اقرب سياره بعز القايله او اقرب حمام اعزكم الله او مرات في الكبت اذا اخوي العود جسوم نايم معاي بالغرفه،المهم المعلبات كانت العلاج لشباب الضايع اللي مثلنا.
واليوم اللى نلاقي عند حاجي او غلوم راعي الدكان علبة لوبا، نطير من السعاده تكون غير عن التونه وريحتها اللي تحكر،كان الوازع الديني عندنا ضعيف،وان احنا الشباب اللي على حل شعرنا مانلتزم ولا نسوي اللي مثل الكبار،بس لو احنا من الجيل اللي الحين كان الخيارات كثيره حق التخشش نهار رمضان،ولا من شاف ولا من دري ،كل شي جاهز وانا ابوكم ولاتسخين ولا شي افتح واكل ،مو زمانا زمن التوبه المعلبه وكم شغله معلبه وماتتوفر الا نادر،واللي يلاقيها قبل الثاني من الشباب شراها قبل الباقين..
في نص كلامه قتله يبه الحين كل شبابنا ملتزمين يصومون و يصلون قال لاتضحكيني يابنيتي الفساد موجود بكل مكان وزمان في اللي يصومون بس شكل قدام امه وابوه ولايفتكر بربه ،وفي اللي مايصلي خير شر ،طول السنه بس صلاة الجمعه مو كانه مسلم وبرمضان بس التراويح عشان قدام اهل الفريج،مثل ولدي الصغير حماني لاصلاه ولا عباده بس شنقول الله يهديه..
بس يابنيتي ما انهديت وصرت على السراط المستقيم وعرفت ان لله حق الا لما تزوجت وعرفت ان زمن التونه كان طيش شباب وبعد ماتزوجت ام عبدالله صرت ملتزم لانها حرمه صالحه الله يخليها لي..
بس صدقيني يابنيتي ان في بهذا الزمن نماذج من زمن التونه يتختلون وينخشون عن الانظار بس رب العالمين يشوفهم يبون يفطرون بحجج سخيفه،عندنا دوام ومانقدر نصوم عن الاكل والشرب عندنا مدرسه وحر والمكيفات ماتشتغل،ربي يقوي الايمان ويهدي شباب التونه...
بعد جلست ذكريات بوعبدالله حبيت اضعها لكم وتشاركوني ذكرياته بزمان التونه...
وجاني شعور هذا المقال به كميه زفاره، كاني في سوق السمج...
خير الكلام..
قال الشاعر..
تعصي الإله وأنت تظهر حبه *** هذا لعمري في القياس بديع
لو كان حبك صادقاً لأطعته *** إن المحب لمن يحب مطيع