موسم السفر نحن به الآن واغلب الشعب شد رحاله الي الشرق او الغرب ،واهم مايميز السفر التجهيز له بالامتعة والشنط والكراتين والصناديق والبقشة بكل مالزم وما لايلزم واساسيات شد الرحال الملابس والذي منه، ولكن ماشاهدته خلال الايام الماضية او اساسيات السفر ادوية الضغط والسكر واخفهم البندول تجد اول كلمة ينطقون بها نجهز ادوية السفر لمده شهر او شهرين بكافه الاعمار واذا لم يجد لديه دواء ضغط اوسكر تجد اخفهم ومن اصغر افراد الاسرة (يمه لاتنسين البندول...) ،اصبح زمن الادوية ولاتجد شخصاً يمشي دون اخذ حبوب ضغط او سكر او معدة او حموضة او ..، فهي سمه العصر الذي نحن به ، شنطة صغيرة مليئة بالادوية ذات حجز دائم بالشنطة الام.
والعجيب الغريب اذا اردنا السفر نشتري ملابس جديدة ونجهز من بلدنا لكشخة والزبرة في بلد الوصول، ونذهب للوجهة المقصودة وكذلك نشتري ملابس جديدة وهدايه للقريب والبعيد، وهكذا يقضون الحياة دفع في دفع وصرف في صرف ونقعد نقول المعاشات ماتكفي والقروض كاسرة الظهر والسلفيات شافطة الاولي والتالي، والاموال رايحة في تفاهات دنيوية وبذخ ومنظرة كذابة لاتفيد في شيء، ولكن يجب ان نركب الموضة ونسوي مثل فلان وعلان، الحمدلله لايوجد شخصية.. او انا ما اريد، ولكن الكل يسافر بالصيف، لازم اسافر الكل بيروح بروح.
نحن بزمن المظهر والمنظر والشكل تجد سيارته (بي ام دبليو) وساعة الماس وكاشخ وفي احسابه صفر وسيارته اقساط و3عوايل في بيت ولكن يسافر ويروح ويختصر اليوم بوجبة واحدة وتكون الوجبة سندويش جبن وعصير بس عشان يقولون فلان راح لندن او باريس، هل هذه عبقريه ام غباء؟!.
اعلانات السفريات مخبلة بالناس يشوفون العروض وان مافي شي مستحيل تسافر الي تركيا واليونان وفيينا ولندن وسويسرا ومصر ب ألف والفين لشخصين وعروض اشكال والوان لايصدقها عقل، يذهبون بدفع السكن وتذاكر الطيران ويكون هناك متفرج فقط، ويكون اسم ان راح لندن وختم مطار هيثرو في الجواز، ويرجع البلاد يمشي وجوازه في مخباه (جيب) (تصدق السنة لندن برد موت الثلج مايوقف وشقتي علي ساحة كلها انجليز يتكلمون انجليزي واجد يشبهون بيكهام شقر وكله ياكلون ماك دونلد وتصدق مافي ولا هندي يبيع فيه كلهم كشخة شقر لا ولا المجانين يسوقون عكس الاوادم يمين ما اعرف شو في عقولهم وش، ولا الباصات طابقين حمر يلق لق مو مثل كروتنا اخضر اجلح املح ولا التاكسي قبل ماتفكر يوقف قبال وجهك صج عيال عرب يعرفون بالشهامة مو تنلطع بالشموس ودق الرقم ولا احد يرد افا يالعرب.....).
استغرب من الكثير من المسافرين والقادمين يجيبون معاهم اكل مثلآ اللي جاي من لبنان اوسوريا او الاردن جايب زيت زيتون او زيتون، او اللي من مصر يجيب فواكه مثل منجا او جوافة وغيرها، يعني السوق مافيه زيت زيتون او منجا ماتيجي مشحونة وتنعرض في المجمعات ليه تحبون التعب وان مسويين عمل جليل وخطير، بتقولون ضيافة وتقدير واحترام صح ولكن الموضوع مو مستاهل تعب ولف كراتين ووزن والطيران مايقصرون بالوزن الا اذا عطيت مسؤول الوزن كيلو منجا او جلن زيت زيتون ويمشي الوزن او تقرقش جيبك وكان الله بالسر عليهم.
ولارغبة بضرب بضاعة السوق واطرش حق الجيران والاهل والقرايب، وطيح البضاعة في كبد فرفور وربعه.
نشرعام2007
ليست هناك تعليقات:
إرسال تعليق