كركوازي

وش فيج يمه معصبة،حسبي الله علية ياحمود هذا جابني من الستي سنتر لحد مدينة خليفة اخذ 80 ريال ولما عطيته 100 قالي شكرآ ماما وشخط،عساه يدخل في طوفة اللي ماعنده لا ذمه ولا ضمير..
ياحمود وينه البتاني راعي البرتقالي اللي يبرد الخاطر ياخذك ويوديك حده 15 ريال و5 ريالات تعطيه زكاه عن صحتك ووصولك بالسلامة من غير اي تكسر ومن ذرابته هالبتاني يقعد ينطرك لحد ماترجع بيتك شفت الآمانة يا وليدي.
هذول يا حمود شاخوا علينا عطوهم لون على الموضة اخضر ماادري يسمونه (كركوازي) وموديلات حديثة من هالسيارات اليابانية واللي خلاهم يشوفون حالهم هالأعلانات اللي يلصقونها على جاماتهم مب ناقص الا يكتبون رسوم الركوب 100 ريال غير رسوم التوصيل وقبل ماننزل انظف السيت من اي غبار او تراب من عباتنا او ثوب اي سنافي..
المشكلة يا حمود على شينهم قوات عينهم كلهم كم موتر في الشارع وماتلاقيهم في اي مكان ويقولون مواصلات، ليه مايكثرون سياراتهم تلاقيهم مثل تاكسي لندن بكل مكان ذاك اليوم ام عذاري تقول كانت تتعالج على حساب الدولة في لندن ورايحه تشتري اغراض من هذا المكان (شرب بوش)هذا اللي يحبونه مثل سوق الخميس والجمعة عندنا شاريه 3 شنط الا تبي توقف تاكسي لقت 4 واقفين قدامها قامت ام عذاري ونقت التاكسي الوردي لان لونها المفضل،عاد هي قالت جذي وجاتني الغصه يا وليدي،احنا نموت وتضربنا الشمس وتيجينا ضربة شمس ولا حد سأل فينا يوقف لك هذا السنافي بالنيسان يسالك تبين شي يا خالتي ،اقوله لا ياوليدي ماابي الا سلامتك بس اطلبلي تاكسي من برنامج وطني الحبيب صباح الخير بيجي اسرع..
ولا ذاك اليوم خالتك ام حميد جايه لنا من الامارات وكنا واقفين عند فيلاجيو وشارينا اغراض الدنيا والدين ،نبي نوقف كروه القايله الساعة 2 الظهر ولا في لون اخضر والمواقف فاضية ولا في تاكسي،قالت لي عندكم اضراب ياام حمود،قلت لها لا بس عليهم طلب،قالت يا ام حمود احنا بدبي من تطلعين من مجمع التاكسي اشكال والوان واخر خبر بتنزل تاكسي روز رايز صافه قدام المجمعات للرفاهيه..
قلت لها اي احنا عندنا حناطير و بعد تكتك قريبآ بيكون منافسة للتكاسي،ماعرفت شنو ارد عليها يا حمود جد انقهرت كل هذا التطور في بلادنا،ويسون لك اطول اسطول من الباصات والتكاسي، والشعب الكادح اللي هو احنا ياحمود نوقف في الشموس نطر تكسي واخرتها مافي الا سيارة من الاهل تمر صدفة عليك وتاخذك ولا اتم منقوع تركب سيارة توصيل الاكل للمجمعات توصلك لان السواق اشفق عليك وصل البضاعة وبيطلع وانت مكانك واقف..
يا يمه وش لج بهالويه كان اتصلتي علي وجيتج اخذج من الستي ولا تدفعين ولا ريال، ياحمود ماعندي رصيد من هذا الغبر هلا اللي ماله علاقة بالترحيب يجب العله،حتى مافي كم ريال طوارىء تقدر تتصل.
يمه انتي مصفية الرصيد،لا ياحمود هو يخلص بسرعة مافيه بركه لا بارك الله في العدو..
لا واللي يضحك اقول للفلبيني كان واقف وجه صاير طماطه من الشمس،اقوله( ابي يور جوال اسوي الو حق ماي ولد ؟)يقولي(نو نو نو)وهو موبايله في يده،اشر له يقولي (نو نو نو) مادري وش ينونو عليه تقول بالع قطوه..
جات وحده منقبة سالتها قالت لي (لاء يا اوختي ماقدرش المو مافهوش دولي)اقول لها ولدي هني في قطر في مدينة خليفة ،قالت لي (لاء يا حاجه دي في البحرين انا عارفة ).
اخرتها لقيت ام نزار جارتنا من زمان نازله من كروة جان اركض عليها وعباتي كانها بات مان اقول لها قولي له يوقف قال لها نو مدام روح (اير بورت) في (امرجنسي كول)،قلت له انا في ازمة نفر خدامه داخل بيت في حرامي يدخل داخل يبي يذبح هيه قالي (وين هدا كدامه كانتر؟) من هند ،(ريلي ماي كانتري انديا،كاااام ماما)..
روحي يا ام حمود معاه بقالي ساعتين ونص انطر كروه عند بيتي،شفت جارتي ام رامي نازله من هذا واجري عليه وادخل وهلق انتي لاتخليه يروح من عند قدام بيتك خل صاحبتك تاخده وجع بيوجع هيك موديل..
عاد ياحمود اللي صار في السيارة يسألني (يور كدامه مسلم)؟قلت له اي مسلم الحمدلله قالي (لا مافي زين كريستيان نمبر ون داخل انديا)،حسبي الله عليك،(وين بيت مال انتي هذا مكان ربش داخل مدينة خليفة؟)والله انت الربش يا الهيس؟
جان يوصلني ويشخط الهيس بغي يلتني ويقطني على وجهي انا واغراضي وراح من غير مايرد لي الباقي..
قول الله يكثر النشامة والسنافية اللي يوصلون هالأودام بدل من مواصلات كشخة وعلى اخر موديل ولا هي موجودة ولا هي في الخدمة، ماادري متى يسنعونها ويكثرونها هالتكاسي حق العرب..
ولا تدري يا حمود بصبغ سيارتك (كركوازي )انت وعبود وكم واحد من عيال الفريج ونحط لكم كم اعلان عن دكان كومار في شعبية خليفة ونخليكم ادورون توصلون العبرية وتربحون خوش تجارة ولا من شاف ولا من درا