شمس الظهيره العمودية الحراره تقترب الى 40درجه واكثر ،ام حمود تهم بالنزول الى منزلها الشعبي بوجها العابس من اشعة الشمس المخترقه عينها وعبوسها من اخبار الفريج التي تجول برأسها بعد تجول صباحي من الساعه السابعه الى الظهر من بيت ام عادل الى بيت خدوجه الى عماره ام ساره الى شاي الضحى لدى ام خميس الى رجوعها لبيتها لتحضير الغداء لعائلتها لان لايوجد عمل لا مدرسه ولا مستوصف طبي ولا نفسي الكل مستغنى عن خدماتها..اثناء هذا حمود استغرب ملامح امه البائسه سالها عسى ماشر يا الغاليه؟ياحمود اسكت وش صاير في الدنيا انقراض كل شيء ودعنا فراشات و نواطير المدارس وسواقين الباصات ماعاد لهم شغل كلهم جالسين في البيوت ربعي ماعاد عندهم دوام حرموهم من المدارس صارت شركات ،وجه اليوم ياحمود اللي حتى اللي عندهم شهادات جامعية مثل غيرهم،حصحوص بنت الجيران طلعوها من المدرسه لانها ماتعرف تقول اسم المديرة الانجليزيه ولا بنت خالها ريومه متخرجه العام صارت معلمه لسنه في مستقلة السنه (قبضوها الباب)لان طولها اقل من متر ونص ولا بنات جمعة التوأم انتهى عقدهم ومايبون يجددون لهم لان المديره تلخبط بأشكالهم مع انهم ناجحين في التوفل وقبلها متخرجين لغة انجليزيه ،كل بيت في الفريج بناتهم خريجات كلهم جالسين مع الفيس بوك وبلاك بيري ويطقطقون يبيعون كاب كيك ولا يسون فطاير وامهاتهم يصبون شاي وقهوه في الاعراس ،شيسون يطرون ياحمود ولا يسون عصابات ولا اعتصام، بناتنا مب لاقين شغل في بلادنا في مدارسنا يدرسون عيالنا وش هالحاله ياحمود ارتفع عندي الضغط والسكر ودقات القلب حمود لوطحت عليك تحمل توديني المستشفى رش علي ماي واقرا علي المعوذات وامسح علي وربك يكتب لي العمر من هذه العلوم اللي تعل القلب..
اخرها ياحمود بزنس جديد يجلبون ايادي تعليميه من هنا وهناك،اموت واعرف ياحمود مين يشور عليهم هالسوالف العجيبه،صرنا بلد جلب (كل ماتريد من اين ماتريد)واهل البلد اقعدوا واعشقوا الراحه ،كنت ابيك تزوج ياحمود الحين مافي زواج تجيب عيال يعلمونهم اعلوم لا لها دين ولا مله ويتكلمون لغة مالها ملامح لايبه يالله حسن الخاتمه مانبي نجيب احفاد انتبهدل معاهم،التعليم في المدارس (رحمه الله عليه)ماعاد به فايده لايبون الخبره ولايبون الشباب الجدد يبون الاحتراف التدريسي مثل كرة القدم،على الاقل الكره في النادي الواحد تقلص عدد المحترفين الى اربع محترفين وفي مواطنين لكن في مدارسنا الكل محترف من الناطور و سواق الباص والفراشه وعمال النظافه والمدرسات والمديره والهيئه والاستشاريين والمناهج بس الطلاب مواطنين لو عليهم خلوهم اجانب وخلوا المواطنين في البيوت يشوفون (سبيس تون )واجد عليهم..
خلاص ياحمود نسوي مشروع تجميع جميع العاطلين عن العمل بكل المسميات من تقاعد وعلى المعاش وماعنده وظيفة نكون (شركه جمهور الملاعب الاحترافية) نكون جماهير بدفع مقابل من الانديه والمنتخب لتشجيعهم في الملاعب مع اهازيج واغاني خاصه وكله بثمنه،طبعا هناك درجات مجاميع خارج قطر من آسيا اقل تكلفه ومجاميع من الخليج متوسط التكلفه و مجاميع قطرية اعلى تكلفة هناك كذا نوع للجمهور القطري اقل من 18 سنة او جماهير نسائية او جماهير ذات الطابع غير المبالي يأكل حب وصفيحة ويشرب مشروبات غازيه ويخليها في الملعب ويروح او الجماهير الكشخه الرزه تركب السيارات الفارهه ماتيجي في باص وتوقف السياره قدام بوابه الدخول يعني جماهيرvip،اي لقاء مع فضائية او برنامج فضفض بالاخص يتم الدفع لجماهيرالشركه،حتى نجد شغل وعمل لهؤلاء العواطليه من ابناء وبنات الوطن،نحن اصحاب الاسبقية ياحمود،اللي سوى فرقة نسائية غنائية واللي فتح مطبخ شعبي واللي صار من الاسر المنتجه واللي قام بعمل ضيافات للاعراس من شاي وقهوه و كرك الى الحسو الكل يفكر ويخترع باب للرزق لان الشهاده الجامعية ماتأكل عيش ولا تأكل هواء في هذا الزمن كان حلم القطريات التخرج والعمل في التدريس أصبح الحلم العيش والحياة الكريمة..
ياحمود وين بكون حالنا مع هذا (العلم) نحط خيام يدرسون الصغاريه قرآن كريم وحروف العربية قبل مايصير هذا كله (صعب)كان يسمونها زمان (المعارف)احنا اليوم ماصرنا نعرف شي عايشين على (الهامش )المشكله في مركب التعليم قام (يطبع) ومثل ماقلوها زماااان(دور فينا يا الشمالي)
ليست هناك تعليقات:
إرسال تعليق