مونديال تـــــايم

الساعة 4 عصرآ حمود متجه الى البيت بعد شرائه كارت الجزيرة من محل اتصالات في شارع السد،استغرق بتفكير عميق مع الساحره المستديره من سيفوز البرازيل ولا الارجنتين ولا جنوب أفريقيا في المشمش تبعها ابتسامه صفراء تدل على الحلم الافريقي المستحيل واجد عليكم الاستضافة بس الفوز بعيد عنكم لو نزل الثلج على قطر في الصيف بتفوزون،قطع حبل افكاره رنة الموبايل (بلاحب بلاوجع قلب) عبود المتصل (هلا عبود انا راجع البيت)مرني عند معصرة الفريج بجيب لك كرك هندي يبرد عليك لواهيب الصيف لاهوب زياده ويرفع السكر الى اعلى درجاته تروح مستشفى حمد تتبرع بدمك الصحي المفعم بسكر زياده.
وصل حمود عند المعصره سلم على كل هنود الفريج وكل واحد يقند راسه بكرك دبل يادوب ينعش الطاسه،دخل عبود السيارة هلا حمود افتح (الرادو) خل نسمع اخبار المونديال كل يوم حد مصاب عين ماصله على النبي،لا عبود مايبون يلعبون في الصيف تعابه طول الموسم اخذوها من قريب ادعوا الاصابه اعرف هالحركات ياعبود خبرك انا كنت لاعب في نادي الفريج انا والاصابه ربع متى ماتبي تكذب قول مصاب،هذا انا قدامك لا مهرجان اعتزال ولا معسكرات خارجية ولا ميدلية تقليد للذكرى واخرتها اسمي (لاعب سابق) اهم شي الولاء موجود (للعنابي)..
لازم تحط علم على سيارتك تشارك العالم فرحة كأس العالم،لاياعبود محد دفعلي قيمه الاعلان ،امس اقول حق حمدي اللي يشتغل بمطعم وجبات سريعة متخصص في الدجاج المقلي الى درجة الاحترق قالي (روح ياعم ندفعلك على عربيتك السردينه)قلت له السردينه تدفع لكم على كل سندويش تأخذه،اصلا اخاف من القراده ياعبود المغنى اللي بغني في الافتتاح توفى الله يرحمه،مباراه وديه في جنوب افريقيا 10 مشجعين راحوا وطي، غير السرقات والامن اللي الله بالخير،والله ياعبود على هالحاله واللي مصرين تكون في افريقيا لازم يعطون قطر المونديل لمده 4 مرات متتاليه لان ماشالله بلادنا امن وامان وراحه بال الا الحر معليه بنوزع شنطه مكيفه يحطونها على ظهورهم وتنفخ في وجهم هواء مدعم بالاكسجين ثلاثي الابعاد والماي مع بيب يطلع منه مشروب كركي مبرد خاص لكأس العالم في قطر،هم يصنعون كورة خاصه لكل مونديال هذه السنة الكل يشتكي من الكوره،لوسألوني ياعبود كان قلت لهم طريقة صناعة كورة لولمبية هندسية مائلة الى الخلف ،تدخل في المرمى قبل ماتشوتها بهواء مخفف سريع الطيران هذا تعلمناه من كور الدكان اللي تنبط من اول شوته ويحلو اللعب وهي (مفشوشة) الكل يشكي من قبل مايبتدي المونديال من الكورة والجو والارتفاع عن سطح البحر والاصابه والامن والامان خل نشوف يا عبود مع بداية البطوله شنو بنشوف من قارة جديده على الرزنامه المونديالية..انطلق..