يوم قطري طبيعي 2-2

ابو حسن: ول ول ول وش هالحر درجه الحرارة 40،ياحرام يا السيارة نشتريج بثمن غالي و مافي شي يحميج من الحرارة.

شيخة: اسم الله عليك يبه،وش فيك.؟

ام حسن: استخف ابوج من الحر، سلط الله عليه جاي من (السويد).

ابوحسن:وين عيادتكم هذه؟خل احذفكم؟و اروح اقرب كافتيريا اشتري لي (كرك) و (كلاب سندويش)، الطباخ رايح النهائي ومخليني اولي من غير اكل خفيف بعد الظهر؟

شيخة: ماشالله عليك يا يبه ، امداك هضمت اكل الغداء (ثريد) و (مشخول) ثقيل غير غثه الدوام طلعوا عيني هالمدرسة ولا المديرة ماتدري وين الله قاطها.

ام حسن: صوب المنتزة روح هناك وبدليك.

ابو حسن: كله عيادات و مراكز صحية هناك،مكدسينهم هناك ما ادري ليه؟؟

ام حسن: يمين بعد يمين بس بس هني، يلا شويخ انزلي، انطرنا يابو حسن ماراح نطول.

ابوحسن:خير ان شالله، سويلي رنه وبجيج.

بعد ساعة.

ام حسن: مابقى دواء ما حطه لي، وفي الاخير طلع (اخوه) صاحب الصيدلية صج نصاب.

ابو حسن: اجر و عافية يا ام حسون.

ام حسن: توكل على الله صوب (سوق واقف) نخلص شغلنا.

ابوحسن: يقولون فاز الغرافة في (الريد يو).

ام حسن: زين يستاهلون.

ابوحسن:يا الله وش هالزحمة دخلنا في المسيرة بالغلط.

ام حسن: لحول ما تعرف تروح من ورا للازم تيجي من (الكورنيش) وانت عارف ان فيه مسيرة.

ابوحسن: وش عرفني، يلا خل نتسلى مع الشباب لحد مانوصل.

ام حسن: وين الوناسة الا (صرقعه) ما بعدها (صرقعه).

ابوحسن:يمه شويخ ليه تبجين فيج شي؟؟ليه مضايقة.

ام حسن:وي مادريت يا بو حسن، حدسي صدق بعد هالسنين.

ابوحسن: ليه وش صاير؟عسى ماشر؟

ام حسن: تذكر يوم قلت لها قبل ماتدخل الجامعة لا تدرسين (تربية فنية) مالها مستقبل ؟

ابو حسن: اذكر وكلنا قلنا لج (الرسم) فن وخلي البنت تسوي اللي تحبه.

ام حسن: هذا هو سوت اللي تحبه والحين بيلغون (الرسم) من المناهج وبتصير بنتك بلا شغل.

ابوحسن:ليه وش فيه (الرسم) حرام ولا بدعه،مايفهمون قيمة الفن ، الله يرحم (الفراعنة) وحضارتهم،وش فهم اللي طلع هالقرار.

شيخة: شوف يبه شعار نادي الغرافة (خريطة قطر)وفيه رسوم داخلة و اللوان،بكره الصغار لا راح يعرفون يرسمون (خريطة قطر) ولا يعرفون الالوان كيف يمزجونها ويلونونها، ويعبرون على نفسهم بلوحات فنية وتشكيلية،ماتبيني انقهر هذا (الفن) يبون يهمشونه ويلغونه. قهررر يايبه.

ابوحسن : معليه يا يمه يابنيتي لا تزعلين، بخليج ترسمين على طوفة البيت من داخل، ارسمي امج وهي تتكلم في التلفون واخوانج وهم نازلين من الباص،لا تحرمين عمرج.

شيخة: يبه لا تطنز عليه، جد تحطيم ،كل شي يصد مونه فيه بهالوقت.

ام حسن: قلت لكم تعلموا لغات تصيرون مترجمين للعماله الوافدة.

ابو حسن: يلا وصلنا (سوق واقف)،بس مافي مواقف.

ام حسن : صف على الرصيف فوق، لاهين مع المسيرة المرور.



يوم قطر طبيعي 1-2

اليوم: السبت 12-مايو- 2012.

الوقت: الساعة 4 عصراً.

المكان:بيت ام حسن+ كورنيش الدوحة.

الاشخاص:ام حسن، ابو حسن ،ابنتها شيخة ، +السائق (محمد اشرف).

ام حسن: جيب السيارة يا (محمد اشرف) بروح الدختر و السوق.

اشرف: ماما انا في داخل (استوديوم)داخل شيخ (كاب).

ام حسن:حسبي الله عليك وش موديك هناك،ماعندك اجازة اليوم.

اشرف: ماما (ملين)واجد هدية داخل هدا يوم، (تكت) رخيص فلوس كتير.

ام حسن:يا اشرف ياربي منك، قول حق (نصير الطباخ) يسوي عشاء حق بابا.

اشرف: ماما كله هندي داخل فريج كلو (باتجا) داخل بيت (ناو) داخل (استديوووم).

ام حسن: الووو اشرف، اي باتجا ياويلي عيالي من (حسون و عبود و فصول).

اشرف: يس ماما كلوا داخل استديوم ويذ (قرافه) بليس .

ام حسن : على كيفك وديتهم،الوووو اشراف، صك الخط بوجهي.

ابو حسن: وش فيج ؟ تصرخين؟الواحد تو قاعد من النوم وتصرخين.

ام حسن: اشرفوه ذالف مع اليهال رايح النهائي.

ابو حسن: والله ان احسن مني اشرفوه اخذ العيال تقولين عياله.

ام حسن: انت خلك ربي بكرشك؟تقول بطن حامل .

ابو حسن: على طاري الكرش، قولي للطباخ يطبخ لي العشاء برياني لحم و صالونه خضار و سمبوسه بطاط و فطيرة سبانخ حق الحديد وكفاية ومعاهم سلطه و روب اهضم بهم.

ام حسن: ماشالله عليك كل هذا بوفية، الطباخ رايح معاهم النهائي.

ابو حسن: نصيروه رايح ليه ما اخذ اذن مني، وش يوديه لحول،ادفع له معاش عشان يروح يحضر المباراة ولا يطبخ لي.

ام حسن:الحين ما هموك اليهال همك نصير، ليكون هو ولدك؟ لا سمح الله.

ابوحسن:روحي زين العيال ماعليهم شر ، خل يتعلمون يحضرون المحافل الرياضية، ولا نصير وش له بالكورة خله مع البصل و الطماط حده.

ام حسن: خلك من البربره اللي مامنها فايدة،قوم ودني الدختر.

ابو حسن: وش دختره بعد يا حرمي المصون؟؟؟

ام حسن: خليتوا فيني شي صاحي انت وعيالك.يلا قوم ودني نص ساعة و اجهز انا وبنتك شويخ؟.

ابوحسن:ان شالله على امرج ، ولا حول ولاقوة الا بالله.

ام حسن: وعقبها بنروح (سوق واقف) ناقصني بزار و لومي اسود.

ابوحسن:وش هاليوم الاسود، سبت زحمة السوق.

ام حسن: كيفك بيقصر على اكلكم.

ابو حسن : لا لا خلاص اوديج السوق ، هو فاضي اليوم.



تاجر طل - طل تاجر

طالب جامعي يقوم بأنجاز بحث ميداني ،الموضوع(تراجع المشاريع التجارية الصغيرة عن العقود الماضية؟لدى المواطن القطري)

اسم الطالب:محسن حمد. التخصص: ادارة اعمال.

(1)

المكان:مقهى شعبي.

محسن:مرحبا يبه، معاك طالب جامعي اسوي بحث وعندي كم سؤال ابي اسالك اياه، ممكن.

المواطن: تفضل وانا ابوك، نرحب بالعلم و العلماء الصغار.

محسن: الله يخليك يبه ،ممكن تعرفنا باسمك وسنك.؟؟وهل لديك مشروع تجاري سابقاً او حالياً.

المواطن: معاك ابوك بومبارك ،العمر قبل ماينولد ابوك،كنا من التجار الهوامير بس وين الحين، خلو لنا مكان هوامير الملايين.

محسن: شنو تقصدك يا يبه بومبارك.

المواطن:اول خل اشربك كرك على حسابي ما تقول بومبارك بخيل،وعقب اقولك.

محسن: مشكور يبه ، مسوي دايت، لو مصر شاهي من غير سكر.

المواطن : حمدي جيب اثنين شاهي واحد بدون شكر والثاني حط به دبل شكر.

محسن: انزين يا يبه قولي شنهي مشاريعك؟

المواطن: وانا ابوك كان عندي معصرة فلافل وعصير رقم واحد في شارع الريان والحين وينه شارع الريان (هردموه) المفروض يكون معلم وشارع اثري بس راح و راحت تجارتنا وذكرياتنا.

محسن: وليه يا يبه ما اخذت في مكان ثاني.؟

المواطن : وين يا بوك هاليومين، صير (تجار طل) عشان تدفع الايجار للاهل العقار ولا التاجر الفقير المسكين اللي على باب الله (ياكل هواء) بطنه انتفخ من اكل الهواء وانا ابوك.

محسن: كيف يا يبه؟ الايجارات معقوله ؟ وكل المسؤولين يقولون؟ بس الكسل من المواطن؟

المواطن: صج والله ، لو كلامهم صح ، انا بو مبارك كان عندي معصره و حلاق و خباز و دكان كان يجيب لي ذهب و الايجار معقول الله يرحمك يا بو سلطان مب الحين ولده اسليطين رفع الاجار من الفين ريال ل20 الف ريال في يوم وليله ، لي قلت له ليش يايبه هذا رزقي، يقولك غلاء معيشة ، راحوا الطيبين، وظهره قوي لان (القانون) حامية صاحب عقار وحلال.

محسن: بس كل شيء صار غالي؟؟

المواطن: ابوك في الجنة، صح يا يبه، بس ما يحكرون لك ، ويسكرون كل الشوارع التجارية و كل شي ممنوع ولا ، ليه مافي دعم للمواطن العادي تجارياً، اذبحونا الهوامير اجاراتهم في السماء ، ليش وش هالطمع ، عسروا علينا والله.

محسن: يعني نطلع بأستنتاج يا يبه، قلة الشوارع التجارية و جشع الهوامير؟؟.

المواطن: ايه وانا ابوك استنتاج و واقع وكل اللي تبية ،قول يارب.

(2)

المكان: مجمع تجاري

محسن: مرحبا اختي ممكن اسالج كم سؤال عندي بحث يتكلم عن المواطن القطري وقلة تواجده في التجاره؟

المواطنة: اكيد اخوي تفضل ،يا حر قلبي وين التجارة؟

محسن: هل لديكِ تجارب في التجارة الصغيرة في البلد؟

المواطنة: اكيد لي اخوي بس ماعندي مكان والله يخلي النت و البلاك بيري، مع الاسعار الخرافية للايجارات و قلة الشوارع التجارية اللي هدموها كلها ويقولون لنا هذا المتوفر، ياحر قلبي حراه والله يا اخوي؟

محسن: وايش مجال تجارتكِ اللي بديتي فيها ؟

المواطنة: الله يخلي صديقتي سارونة عندها موقع و مسويه لي صفحة في فلكر و فيس بوك (ببلاش) من غير مقابل يكسر ظهري،دخلت مجال الاكل وسميت الموقع( بلعة وبس) سويت (كاب كيك و خنفروش و سمبوسة صغيرة و حلوى هندية) من اختراع خدامتنا وعليها طلب رهيب وبعد كان عندي تجارة حرة مثل (اقلام) تعلم الاطفال الحروف الابجدية من غير معلم وبعد (عطور عربية و فرنسية و اندونيسية)أجيبها خدامتنا لي سافرت بلادها عليها اقبال ( غير طبيعي).

محسن: ماشالله اختي وكل هذا وما قدرتي تفتحين بوتيك في مجمع ولا محل في اي مكان؟

المواطنة : لا يا اخوي وين افتح الاجارات غالية واللي اكسبة بروح في (بطون) الهوامير، خلنا على النت و اعطي المندوب 50 ريال كل شهر، واجد ابرك .

محسن: يعني اختي اطلع بأستنتاج من كلامج ان السبب قلة الشوارع التجارية رخيصة الثمن و جشع الهوامير.

المواطنة: طبعا اكيد اخوي و مافي غير هالسببين ، والقانون بصالحهم قلباً وقالباً .

(3)

المكان : محطة البترول.

محسن: السلام عليكم اخوي ممكن اسالك كم سؤال عن الاعمال التجارية الصغيرة وقلة اقبال المواطن عليها اليوم؟

مواطن شاب: تفضل اخوي حياك الله، توني اهوجس، جايب (تواير)من الصين شحن خاص، ولا عارف افتح محل ولا عارف اسوي شي؟كله من رحنا لهم بمكان قالولي (غير تجاري) ولو لقينا تجاري وهذا من (المستحيلات) وان لقيت وعلى قولتهم (شارع تجاري)، تعال شو ايجاراتهم يامال العافية همجات تكبر (كروش) الهوامير.

محسن: وشنو سويت بالتواير؟ كيف بتبدأ التجارة هذه؟

مواطن شاب:والله يا اخوي خلها بيني وبينك خالتي اللي عايشة في الكويت يسون (السرداب) في البيت صالات عرض تجارية و يكدون خير من هالسالفه،الوالدة الله يطول بعمرها اقترحت علي اقتراح نسوي (حوش البيت) معرض تجاري في حوش البيت يومياً من (الساعة 4 العصر لين 8 المساء) النسوان بصوب و صوب الثاني للشباب، وندفع للوالدة على الطاولات و الكراسي مبلغ شهري 150 ريال والباقي حق اللي يبيع، شنسوي تساعدنا ندور لنا دخل بديل للاهل الفريج، تعبنا وانا اخوك نبي (بيزات).

محسن: نوصل للاستنتاج اخوي ان السبب قلة الشوارع التجارية و غلاء الايجارات بشكل كبير.

مواطن شاب: ايه وانا اخوك ، قول غلاء فاحش و غلاء جنوني و انقراض الشوارع التجارية بفعل فاعل.



فايز كاري 2-2

 

فايز:يلا قولي وش اكتب في الورق، والله ودي اشتغل في مكان كله سفر ومن طيارة لي طيارة و اللبس جاكيت عليه شعار (قطر) في الجو، ما ابي اكون (طيار) حتى لو اكون خادم مضيف مب خادم مسافرين بس اسافر..اه ياااابااااي على الاحلام.

ناصر: افا عليك عطني هالورق الاصفر واكتب كل الاشياء الاولية من (الاسم و العمر وخلافه) بالعربي اطبع بطاقة الشخصية، عقب عن خانة اللغة اكتب الاتي لغتي الام (الاوردية)اجيدها تحدث و كتابة ثم (الانجلواوردية) ولا اجيد اللغة العربية بتاتاً،اكلتي المفضلة (كاري بالفلفل الحار جداً)ثم (البرياني مع ربيان المحيط الهندي).

ناصر:ماخلصنا لي جيت تروح المعرض عند مكان تقديم الطلب،اللبس بنطلون رصاصي و بلوزة كاروهات فيها (احمر واخضر و بني و ازرق و بنفسجي) واهم شي (الابه) تكون بيضه دليل النظافة .

فايز: وين القاه هذه العفيسه.

ناصر:دق على سواقكم هو بجيبه لك بس عطه مقاسك، خل اكملك وتشتري جاكيت عنابي وحط عليه بروش صورة غاندي.

فايز: لحول وين اجيبه؟

ناصر: كلم اختك الصغيرة اميره،قول لها تطبع لك صورة غاندي من النت ،وقصها ولصق من وراها دبوس ، وقزه في الجاكيت.

فايز: عندي ثوب اليوم الوطني عنابي ،يصير اقصه ويصير جاكيت.

ناصر: احسن واحسن ينفع عشان يبين صناعة آسيوية معتبره.

فايز: والله حاله ، كل هذا عشان اللقالي وظيفه ، اطيرني بين السحاب.

ناصر: طبعا اللعب على الموجه دام خاطرك في وظيفه فيها سفر في الاجواء العالمية طوال السنة وبتحصل على تذاكر ابلاش حق العائله وحق خويك (نصوري).

فايز: وانا اشهد بغركم هداية ،بس خل يقبلوني.

ناصر: بس اخر شي قبل ما انسى ، تشتري (زيت تاتا) وتدهن به شعرك في الليل والصبح قبل ماتروح المعرض،ولا تنسى تنفخ (كرشتك) لي اقبلت عليهم لانها من علامات الجوده وكثرت اكل العيوش .

فايز: هذه يبيها تمرين عشان اضبط الدور، ماكن ادري ان كل الشغله تمثيل في تمثيل.

ناصر:لك خاطر تقدم في شركة ثانية.

فايز: ودي اصير للاعب في (لخويا) ليه انت بس يجيك عرض من (الجيش).

ناصر: يا غيار، هذا مكانة مب هني، هذا بعلمك عليه بكره ، يلا روح الحين، انا وراي مشوار بجيب الاهل من فيلاجيو، وبعشيهم في مطعم هندي.

فايز: جيب لي معاك تيك اوي و نزله في بيتنا.

ناصر: ابشر ، بجيب لك كاري اللي تفوح ريحته لي بكره وتصير الطيار (فايز كاري).



فايز سي في 1-2

المكان :مجلس ناصر.

الاشخاص: ناصر + فايز (اصدقاء).

الحوار:كتابة )سي في) للمعرض المهني.

فايز:جيتك على وعد البارحه،تعلمني كيف اكتب (سي في)حقي للمعرض المهني ،ياما كتبت السنوات اللي طافت ولا في امل،انت من اول سنة لقيتك لك وظيفة (يا مال الضعفه).

ناصر:ماشالله يااااخي (من شر حاسد)،ما ادري ابط عينك (المبققين)هذول.

فايز: جبت معاي ورق سنع يعجبك من كل الاشكال مريت المكتبة.

ناصر:الله يرحم ايام المكاتب الفتى و ربعها؟راح وطرهم الحين في الفلاشات وخلص امورك يا الحبيب.

فايز: صبر عاد اوريك الورق السنع (ورق اصفر)مال رسايل الهنود ،ورق فاخر يقولون يكتبون فيه رسائل الديوان ،ورق ابيض مخطط مال ابحاث المدارس الحكومية سنة الطبعة، اللي يسمونه (فول)ما اعرف شنو.

ناصر: ماله داعي هذا كله يا ولد الناس.

فايز:انت وش فهمك ،لازم ادخل المعرض و انا ماسك الظرف مع الرزه و الغتره منشية من الصبح وافتر من مكان لي مكان داخل المعرض.

ناصر: لا بالله عرفت ليه ما اقبلوك من اول معرض لين اليوم، الحين وضحت الرؤية وضوح تام.

فايز:يلا شنو ابدا فيه اكتب اسمي و سني و مهنتي و شهادتي صح ولا انا غلطان.

ناصر: صح بكل شي بس مهنتك شنهي بالله عليك انت تبي مهنة عن الذكاء الزايد اقول.

فايز:اكتب باللون الازرق ولا الاسود ،الاسود اكشخ على قولتهم (ملك الالوان).

ناصر: اعنبوا غيرك،بتشتري نعال ولا سيارة ؟كلها ورقة (سي في) لا راحت ولا جات.

فايز: وش فهمك هذه تعبر عن الشخص ومكنوناته وتعب السنين.

ناصر: طيب يا النجيب ، لاتنسى ترش العطر على الورق.

فايز : الاسم : فايز عزيز، خريج ثانوية حكومية و جامعة...

ناصر: الا صج ليه اسمك (فايز) من اللي سماك هذا الاسم، ماقد شفتك (فايز) من عرفتك طول حياتي،حتى في الابتدائي اللي كلنا يعطونا هدية على الطابور انت ماعطوك ولافزت، يوم لعبنا في كرة قدم في الفريج انت الوحيد اللي اكنسرت رجله من بد خلق الله.

فايز: عجبني سؤالك،شوف ياطويل العمر سنة 1984 الغالية الوالدة كانت جايبتني على وجه هالدنيا في (مستشفى حمد) بس يومها كان في (سرير)، مو مواليد هالسنين ينولدون في الممرات، الا يحطون مسلسل جديد ذاك الوقت ،وامي و ابوي حيرانين فيني شنو يسموني كانوا بسموني (خان) على الدكتورة، الا يطلع مسلسل(فايز التوش) ويسموني عليه.

ناصر: من (خان) الى (فايز) ياقلبي لاتحسن كان شغل مخه ابوك شوي وسماك (غانم) على (غانم السليطي).

فايز: دقيقه خل ارد على الجوال اختي (فوزية)الو هلا..مشغول مع نويصر اكتب سي كي ،سي دي.

ناصر: يا الثول (سي في).

فايز: اقصد (سي في ) ال (في) حق (فات مان) فهمتي، ساعتين وجايكم.

ناصر: (بات) هي (في) لا بالله انك مخ ، طيب ليه ما تزوجني اختك فيوز؟

فايز: اختي (دكتورة فوزية) تجوزك انت؟ياللي ما خلصت الاعدادي؟مايجوز انت بنفسك ماترضى.

ناصر: لا ارضى انا مع تعليم النساء بالعكس.

فايز: يا العيار يا نويصر تبي فلوسها،صج هي تحصل على همجه.

ناصر: يحصل لها واحد مثلي يشتغل في شركة النفط وقريباً بيصير للاعب احتياط في الجيش جايني عرض.

فايز: الا صج اعدادي ولقيت لك وظيفة في شركة بترول في المعرض الاول وانا شهادة بكالوريوس من (جامعة الشهيد الله يرحمه) ومب لاقي لي وظيفه لين هذا المعرض واقعد انطر كل (ابريل) ويطلع (كذبة ابريل) على قولة الوالدة، هم لو يغيرون الشهر كان عينت من الله خير.

ناصر:الدنيا حظوظ عاد انت لا عندك لسان حلو ولا تفهم في الكورة وين تلاقي لك طريق في هالبلد، حتى (التيله) ما فلحت فيها نشغلك في (سوق واقف).



جدتي حصه

المكان:بيت الجده (حصه).
الاشخاص:الجده حصه +بنت ولدها نوير.
نوير:تقبل الله طاعتج يمه حصة،اصب لج قهوة.
الجدة:منا ومنج صالح الاعمال يا بنيتي ،جيبي ومعاهم (التميرات) احس بهبوط ما اكلت غداي اليوم،عمج منصور ماجه ولا عمتج وضحة رجعت البيت بعد الدوام.
نوير:ياحياتي يا جدتي ،اهم ماعليج صحتج،كان كلمتيني جيت اكل معاج.
الجدة: يا عيارة يا نوير، انتي ماتيجيني (الافي السنة احسنة)،و تكلمين ميري من وراي تقولين لها سويلي (بلاليط).
نوير: انااااا لا يمه ،ميري كذابة، انزين يمه وين عمي منصور و عمتي وضحة.
الجدة:عمج راح يشيل العنة اللي في مخيم سيلين قبل اول الشهر لا تروح عليه العشر الاف،مواعدني يوديني العمر اول مايقبضها.
نوير:والله جزاه الله الف خير عمي ،زين تذكر يشيل الخيمة ولا ان الجو حلو ومطر ينسى الواحد ،كانت راحت عليه .
الجدة: وعليه عليكم يانوير ، زمانكم غير شكل حتى البر ارض الله الواسعة صار كان (فندق) تحجز ولك وقت معين،شنقول غير الله المستعان، الجو ربيعي حتى (القيض) ماجه، خلوا خلق الله يشلون خيامهم.
نوير: لا جدتي في اسباب بيئية؟
الجدة:سلط الله عليكم بنات الجامعة كله كلامكم (تفلفس) و (مرادم)،امس جارتنا ام سعد تقولي في جامعة أدخل اللي عندهم شهادة ثانوية.
نوير: في،هذه يا يمة فكرة جديدة،يجبرون بخاطرهم،ان في جامعة ادخلهم اسمها المجتمع.
الجدة: خلاص بعطيج شهادتي تودينها.
نوير: شهادتج جدتي مب معتمده هذه من مطوع .
الجدة:المنة عليهم،شوفي وش هذا النادي اللي يلعب؟ولدج عمج محمد (عواس) بيلعب اليوم هو قالي شوفيني،اللهم صلي على النبي بحرف الخاء.
نوير:شنو نادية ياجدتي خريطيات ولا خور ولا شنو.
الجدة: ما ادري كاتبين الاسم بالكمبيوتر هذا خط عربي صعب.
نوير:لا يمه هذا حروف انجليزية مختصرين اسم الفريق.
الجدة:هو قالي لونه ازرق اكيد بس معاه يا احمر ولا ابيض ولا اسود ما اذكر.
نوير: يمه عندنا الحين فوق 12 نادي درجه اولى و بعد في درجة ثانية.
الجدة: وي من وين يجبون هذول كلهم عشان يلعبون.
نوير:يايمة وش اقولج خليني ساكته،يمه حصه سالت اخت عواس في بلاك بيري (عواشه )تقول ان اخوها يلعب في دوري الفرجان.
الجدة:يعني وين اسمعها على (الريديوا ).
نوير: لا يمة مالها نقل.
الجدة: اه يا الهيس يا عواس قص علي.

الوعد لندن

المكان: بيت اموله.
المناسبة: زوارة صديقات.
الاشخاص: اموله، جوجو،نوير.
اموله:الله شنطتج تجنن وش هاللون الفسفوري؟عجيب مع العباية؟
نوير: هذه سعرها عشرين الف ريال من فيلاجيو امس شاريتها،توها واصله لهم المحل كلموني ورحت شريتها على طول.
جوجو:مالت عليج صج انج (اي شي)هالمبلغ اشتري فيه تذاكر الصيف حق (لندن).
اموله: صج نوير كل فلوسج على الشنط ، حرام عليج؟سوي فيها شي مفيد.
نوير:هذا شي وايد مفيد، كل البنات يطالعونج ،والاهم(ينقهرون).
جوجو:نوير يا هبلة، الحين بتصكين الثلاثين،وليحين مالقيتي لج (عريس الغفلة).
نوير: وش دخل (لندن) في الموضوع الحين يا جوجو.
جوجو: انا اقولج (الله يسلمج) ماتشوفين المسلسلات الخليجيه و الروايات الخليجية كلها يقولون لج الحب في (لندن) و القفص الذهبي يدخلونه من بوابة (بلاد الضباب).
نوير: اه يا قلبي من صجج يا جوجو،صدقتي خبال المسلسلات .
اموله:صدق كلامها ،بنت جيرانا راحت (لندن) ومن رجعت تزوجت.
جوجو:تزوجت من؟لاتقولين (خدوج)ام شعر احمر.
اموله: ايه هي ماغيرها،اخذها ولد ولد جيرانهم.
نوير: لا تقولين لي ماشافها طول عمره وماشافها الا في (لندن)هذا صج بيكون فيلم.
اموله : ما ادري يقولون.
جوجو: شوفوا يا صديقاتي لازم نجرب (لندن)هالصيف شوفي المسلسلات و اسمعوا القصص،يعني اكيد في جوهم شيء غير،مب من فراغ هالسوالف.
اموله:هذا خرابيط كتاب يقولون (لندن) و(لندن) لان مايعرفون غيرها ،يعني زمان يضربون المثل في عنتر وعبله وقيس وليلى الحين الموضة (لندن) شعار الحب.
نوير: لا صدقوني هذا فكر سياحي جديد من الانجليز، خبركم احنا مانفهم الطرق الجديدة، خبيثين هالاوادم.
جوجو:يا حسرة قلبي كم شهر باقي على الصيف (لازم اضعف)؟

كـــــــان يــــا مــــكان

المكان : مقهى شعبي – سوق واقف
الوقت: الساعة 7 مساءً- يوم الجمعة
الاشخاص: محمد – نايف (اصدقاء)- عطا الله (عامل)في المقهى.
محمد: لا والله يا نايف انا اللي بدفع،عشان خاطري؟اعتبرها احتفال برجوعك من الدراسة بالسلامة من امريكا.
نايف: اشدعوة يا الغالي،انا اللي بدفع وحشني نوط (الريال) اطلعه من مخباي،كله اطلع (الدولار) ولا الحبيب (جورج واشنطن) زعلان ويخزني كل يوم ،لان مب مقدرينه حاطين صورته على عمله صغيره ،ويه خشمه.
عطا الله: مالكم يا شباب؟ماتدفعوا يلا ورانا شغل؟ماتدفع يا بيه (دولر)،اصلك انت في مكان سياحي في (قطر) ولازم تدفع بعملة لها قيمتها.
نايف: عسى ماشر يا الحبيب، مب عاجبج الريال يا ريال؟؟؟
عطا الله: لاء لاء مش قصدي بس تعرف (الدولار) له قيمته.
نايف: طاع هذا وش يقول صج انك...
محمد :خلك منه ماعليك،يحسب عمره في (شرم) ولا (الغردقة)،هنا (سوق واقف)؟يلا قولي كم حسابك.
عطا الله: ب صلا على النبي 1200 ريال بس.
محمد: شنو شنو شنو ؟؟ليه ان شالله؟وش طالبين احنا؟
نايف: يبه وش فيك قصد 120 ريال يمكن؟
عطا الله: لا سعادتك 1200 ريال يعني (اتناشر) و قدامهم (زيرو) (زيرو).
محمد:ممكن تعد علي الطلب والاسعار ولا اطلب (حماية المستهلك).؟
عطا الله: حماية المستهلك ايه يا سيدي،حقولك،2 شيشه بنكهه الكرك 400 ريال و واحد شاي 50 ريال و واحد (شبكشينو) دوبل 100 ريال و واحد بلاليط مع بيض مستورد 150 ريال و واحد مكس نخي باجلا مع شطه مستورد 150 والباقي تمن الاطباق و الاكواب اللي شغلتوهم و الكراسي اللي قاعدين عليهم بص الطابور اللي مستني وراك و الباقي بخشيش للعبد لله.
نايف: اعنبوا غيركم هذه تسعيرة قهوة شعبية ولا سوق الذهب؟
عطا الله: بص حضرتك وكمان مش حاسبناك على صوت الموسيقى والاغاني الشعبية اللي بتسمعها في الهواء الطلق من غير (تمن) في مهرجان سوق واقف، احنا كرما بس مين يقدر.
محمد: لا بالله عينا خير فتحتوا سوق واقف للاغاني و الطقطقه وسكتنا والحين صار (ملاهي) تكسرون عيالنا وقلنا لاحول ولاقوة الابالله وش تالي.
نايف: (تفلس) طال عمرك من هالفواتير في مكان سياحي من الطراز الاول، او تاخذ قرض بنكي للتسكع في (سوق واقف) بس مع فوائد طبعا..
عطا الله: بص حضرتك حقولك حاجه مهمه الشيشة بنكهه (الكرك) دي منتج (قطري) بنعجنه هنا في مطبخنا في (سوق واقف)،كل يوم الولد (كومار) بيعجنه وبخمره في الشمس يعني منتج قطري 100% وفرش ،وده تمنه فيه.
نايف: على اساس بشفطه من هني بيطلع في مخي فلوس.
محمد: قهر و امراض خبيثه لان طلع عليك اغلى من بيع السوق.نايف: قم امش ورانا دفع (صفطت) السيارة لا تطلع بكم (الف) بعد.

صبري صابر صبرالله

المكان: بيت ام حسن – الوكرة.
المناسبة: رجوع ام حسن من العمره.
الاشخاص: ام حسن +ام متعب و ابنتها الهنوف.
ام حسن: حي الله من جانا يا هلا بأختي الغالية ام متعب و هنوفه نورتوا الجنوب كلها.
ام متعب:يا جعلها عمره مباركة يا حبيبتي، ميري حطي (الباسكت) على الطاولة و ( الفلاور )عند الباب.
ام حسن: ماقصرتي يا حبيبتي اليوم مطرشه غدانا و الحين جايبه هذا كله معاج.
ام متعب: تستاهلين الزين و الزود كله.
ام حسن : شلونج يآ أخيتي مع العيال.
ام متعب:مجنني (سيوف) ثانوية عامة و الدور الاول راسب ب4 مواد والحين مايدرس رايح العنه عند شلة الدمار.
الهنوف: وبعد خالتي كل فلوسنا رايحه على المدرسين الخصوصين، اقول حق امي جيبيلي (اي فون) تقولي ماعندي فلوس، قلت لها (بلاك بيري )ارخص قالت لي لا خل الفلوس حق مدرسيين سيوف.
ام حسن: يا بنيتي وش لج بهالسوالف انتبهي لدراستج الجامعيه احسن، على ايامنا ما كان عندنا هالسوالف ونطلع من الاوائل.
الهنوف: اليوم لو ماعندج وسائل العصر ما تعيشين ولا تنجحين، اسئلة الامتحان ناخذها من البلاك بيري.
ام متعب : ماعليج منها يا ام حسن. جبت حق سيوف هالسنة مدرس اسمه (عبدو الزول) ولا فاد معاه وجبت له (اسامة الحمص) ولا نفع معاه ،وهم جبت له (مايكل)ولد مهندس البترول اللي مع بومتعب في الشركة،راح اجازة نص السنة كندا ولا عاد رجع..
الهنوف: ههههه يا يمه عقده ولدج (سيوف)، طار الولد بجلده قبل ما يصير متخلف عقلي.
ام متعب: لا يا ام حسن كل هذول السنه اللي طافت، هالسنة عاد قالولي النسوان في التدريس احسن من الرجال وجبت له (سهير محروس)يومين ولا شفتها ورقمها (خارج نطاق الخدمه)، وعقبها جبت (اسعاف الازرق) و ( ام تاج السر)وحياتج كلهم طلبوا 5 الاف ريال على الشهر قلت يلا مو مهم بس ينجح العله ولدي.
الهنوف :اقول لها يمه؟(البنت تساسر امها)
ام متعب: انطمي يا هنوفوه عيب.
الهنوف :بقول بقول يمه ماعلي منها.
ام حسن: وش فيكم؟ عسى ماشر؟صاير شي؟
الهنوف: لا خالتي بس ابي اسالج، ولدج حسن كان من الاوائل في الثانوية العامة السنة اللي طافت؟من كان يدرسه ؟نبي نجيبه حق سيوف خل انساعده وينجح ،(يمكن الله ينفج في صورته)ويجيب نجاحه على يد هالاستاذ.
ام متعب:حبيبي حسن ماشالله عليه (من شر حاسد اذا حسد)الحين يدرس في امريكا هندسة.
الهنوف: خالتي ماسالت وين يدرس؟ ماشالله عساه يبقى فيها 10 سنين ويصير سفير فوق العادة في الهندسة ،قلت من كان يدرسه في الثانوية..؟؟
ام حسن: اي كان يدرسه استاذ اسمه (صبري صابر صبر الله) اشهر مدرس درس الاوائل في قطر واخرهم ولدي (حسن) من سنين وهو في الوكرة معروف عند الكل.
الهنوف: عطيني رقمه؟خل نكلمه يدرس (سيوف) حتى لو يطق خط كل يوم من (الشمال) لين (الوكرة) بس ينجح.
ام حسن: رحمة الله عليه..
ام متعب: اسم الله على وليدي.وش فيج ام حسن؟
ام حسن : لا يا الغالية اسم الله على وليدج، الاستاذ(صابر)عطاج عمره، قبل ماتطلع نتايج الثانوية العامة العام الماضي.
ام متعب: وي وي وي صج.
الهنوف : جاب اجله الشاطر حسن.

أسعاف موستفااا

المكان : أرض المعارض- الدوحة.
الحدث:معرض المجوهرات.
الاشخاص: مصطفى المصري و جو الفلبيني (سواق+مسعف)+ سيارة الاسعاف.
مصطفى : ياه على الملايين اللي في المعرض ده،لازم يكون فيها عربية آسعاف بره.
جو: وات يو سي موستفا؟
مصطفى: ولا حاقه يا ابني ؟بس بقول طول السنة مش بنيقي هنا؟بس في المعرض ده ليه؟
جو: بيكوز ات امبورتن ؟ مليون اند مليون هير؟ميبي هاسبن موت داخل؟ (وي) يجي شيلي هدا بيبل موستفا؟
مصطفى:بص يا جو ان ماي كانتري، ذا بوس هي هاز مليون ان هز قصر؟ هو دلوقتي بح مش موجود في الحبس؟
جو: وات قصر ؟ وات يو سي ؟
مصطفى : استنى يا ابني حولع السجارة (اعمر بيها الطاسه)وحقولك بأنجليزي بتاع دكتور بيل؟ يخرب بيته بيتكلم انجليزي على طول ومش بيتعب؟
جو:نو نو نو اوت موستفا؟نو سموك ان ذا (انبلونس)؟
مصطفى: نو أنت ؟ بره غبره مش حقدر؟الصحراء حتدخل في مناخيري.
جو: بات ممنوع ؟
مصطفى :بص يا عم جو القصر ده مكان هاز (روم.. روم) كتير اوي ،بيق هاوس .
جو: اوكي موستفا.
مصطفى:ما شالله كان في معرض بيبر كتاب من 2 شهر ومافي سيارة كبير داخل باركن، دلوقتي كله هاي هاي كار .
جو: افكورس ذس (جولري)، اي سو (سكيرتي) آت مورنيق سيم سيم (بوليس).
مصطفى: بص تحت يا جو يمكن تلاقي ، قطعه الماس ولا قطعه (قولد) طارت مع الغبره
جو: سي سي ؟مووووستفا.
مصطفى : مالك يا عمي هرتني سي سي ؟؟
جو: ذير از (بينك كار)،شي از لايك (ستار) ان (موفي).
مصطفى:بص بص على الغبره دي،عربيتها بتلمع لمعان،طبعا من قدك يا هانم.
جو:ان هير (باق) ،هومني مليوووون ،موستفاااا؟
مصطفى :دي عندها دفتر شكات تشتري الفلبين ياعم جو.
جو :اي هوب الله ول قيف مي (وان مليون) ريال ونلي.
مصطفى: انت فقري لما تيجي تدعي ربنا قول يارب (ملايين الملايين)مش تحدد يا اهبل.
جو:يو ماس تو كام تو فلبين ؟يو ويل لايك ماي كانتري؟
مصطفى : لما نطلع اجازة نروح نصيف عندكم انا وام العيال.
جو: كام تو ماي بابا (هوتيل).
مصطفى : ايه ياعم (هوتيل)؟ ابوك عنده (هوتيل)؟
جو : يس (هوتيل) بات نو (ستار) ،فيري (سمول).
مصطفى : انا لو عند ابويه (هوتيل) كنت دلوقتي بزنس مان ولا مهندس بعمل (كبرهات) داخله في بعض زي (دوار المجنون) ولا دكتور بدل ما انا في العربية السردينة دي ..
جو: اي رمبر (دوار مجنون) ات واز (كريزي)اي دونت نو ها اتس ورك.
مصطفى : اترحم عليه يا ابني..